Bas múftı «Ábdýsattar Smanov» meshitiniń ashylýyna qatysty (FOTO)
Búgin QMDB Tóraǵasy, Bas múftı Naýryzbaı qajy Taǵanuly el Táýelsizdiginiń 30 jyldyǵyna oraı Shymkent qalasynda jańadan salynǵan Ábdýsattar Smanov atyndaǵy meshittiń ashylýyna qatysty.
Elimizge belgili ǵalym, din qaıratkeri Ábdýsattar Shákiruly esimimen atalǵan meshittiń ashylý rásimi Quran oqýmen bastalsa, alǵashqy bolyp Bas múftı quttyqtaý sóz sóıledi.
«Aǵaıyndy Smanovtar – barshamyzǵa belgili din salasyna ólsheýsiz úles qosyp kele jatqan úlken áýlet. Búginde sol áýlettiń uıytqy bolýymen ashylǵan «Saryaǵash» medresesi bolashaqta ımam-ustaz bolýdy armandaǵan qazaqtyń qaradomalaq ul-qyzynyń qııalyna qanat bitirgen ári elimizdegi tańdaýly dinı oqý oryndarynyń qatarynda. Ustaz Ábdýsattar Shákiruly ultqa, dinge adal qyzmet etken, ajaly jetkenshe shákirtterine dáris bergen bilikti ǵalym, maıtalman maman edi. Minekı, búgin Ábdýsattar Shákirulynyń esimi berilgen meshitti ashyp otyrmyz. Jańa ǵımarattyń ishi-syrtyn Alla Taǵala nurǵa toltyryp, Ábdýsattar aǵamyzdy raqymyna alǵaı», – dedi QMDB tóraǵasy.
Sondaı-aq, Bas múftı QMDB Ǵulamalar keńesiniń múshesi bolǵan marqum Ábdýsattar Smanov jaıly ǵıbratty estelik aıtyp, osy meshittiń bas ımamy Berik Shotabekovke qasıetti Quran Kárim men káde syılyq tabys etti.
Budan keıin «Saryaǵash» medrese-kolledjiniń quryltaıshysy Ábdýjapar Smanov Bas múftıge rızashylyǵyn bildirip, meshit salǵan azamattarǵa alǵysyn jetkizdi. Saltanatty shara aıasynda dintanýshy Muhamedjan Estemirovtyń Ábdýsattar Smanov týraly jazǵan «Ustaz ulaǵaty» kitaby úlestirildi.
Sondaı-aq, Bas múftı Naýryzbaı qajy Taǵanuly 1500-2000 adamǵa arnalǵan jańa meshitte jamaǵatpen birge juma namazyn oqyp, el amandyǵy úshin duǵa jasady.
