BAS MÚFTI «ÁL-YQYLAS» MEShITINIŃ AShYLÝ RÁSIMINE QATYSTY
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Túrkistan oblysyna sapary aıasynda Ordabasy aýdanyna qarasty Temirlan aýylyndaǵy «Ál-Yqylas» meshitiniń ashylý rásimine qatysty.
«Barshańyzdy Túrkistan oblysy, Ordabasy aýdany, Temirlan eldi mekeninde jańadan boı kótergen «Ál-Yqylas» meshitiniń ashylýymen shyn júrekten quttyqtaımyn! Alla Taǵala jańa meshitimizdi ımannyń uıasy, ilimniń ordasy, tárbıeniń mektebi, birliktiń mekeni, júrekter toǵysatyn qasıetti oryn etkeı.
Alla Taǵala Quran Kárimde «Táýbe» súresiniń 18-aıatynda: «Rasynda, Allanyń meshitterin Allaǵa jáne aqyret kúnine ıman keltirgen, namazdy tolyq oryndaǵan, zeket bergen jáne Alladan ǵana qoryqqan adamdar kórkeıtedi», – deıdi.
Bul aıattan meshitti kórkeıtý tek onyń qabyrǵasyn turǵyzýmen shektelmeıtinin ańǵaramyz. Meshittiń shynaıy kórki – onyń jamaǵatynda, oqylǵan namazynda, úıretilgen iliminde, aıtylǵan nasıhatynda, jasalǵan duǵasynda. Sondyqtan búgingi ashylyp otyrǵan «Ál-Yqylas» meshiti ǵımaratymen ǵana emes, rýhanı turǵydan kórkeıe bersin dep tileımin»,-dedi Bas múftı Naýryzbaı qajy Taǵanuly.
Aıta keteıik, jańa meshittiń syıymdylyǵy – 250 adam. Qulshylyq úıi aýyl turǵyndarynyń dinı rásimderdi oryndaýyna jáne rýhanı qajettilikterin óteýine múmkindik beredi.
