Bas múftı Almaty ortalyq meshitinde juma ýaǵyzyn júrgizdi (FOTO)
Búgin, qasıetti juma kúni Bas múftı Naýryzbaı qajy Taǵanuly Almaty qalasynyń Ortalyq meshitinde juma ýaǵyzyn júrgizip, meshit jamaǵatymen júzdesti.
QMDB Tóraǵasy Paıǵambarymyzdyń (oǵan Allanyń salaýaty men sálemi bolsyn) meıirimdiligi jóninde juma ýaǵyzyn aıtty.
«Paıǵambarymyz (oǵan Allanyń salaýaty men sálemi bolsyn) búkil ǵumyry arqyly adamzatqa meıirimdiliktiń eń úlken úlgisi bola bildi. Eki jıhan sultanynyń meıirimdiligi – tek qana adamzatty emes, barlyq bolmysty qamtydy. Ózine qanshama japa shektirip, jaqyn joldastaryn azaptap, mazaq etip, qol jumsaǵandar úshin de: «Ýa, Alla! Qaýymymdy keshire gór, olar shynymen de bilmeıdi», – dep duǵa tiledi» dedi Bas múftı.
Sondaı-aq Naýryzbaı qajy Taǵanuly ardaqty Paıǵambarymyzdyń (oǵan Allanyń salaýaty men sálemi bolsyn) meıirim men raqymǵa toly ómirinen mysaldar keltirip, onyń árbir sózi men isi meıirimdiliktiń aıasynda órbigenin tilge tıek etti.
«Úmbetiniń basyna kelgen árbir qıyndyq Alla elshisiniń júregine qatty batyp, olarǵa erekshe jany ashıtyn. Olardyń osy dúnıedegi qııametke deıingi taǵdyrlaryna qatty alańdaǵan Paıǵambarymyz (oǵan Allanyń salaýaty men sálemi bolsyn) sońǵy demi shyqqansha «úmbetim, úmbetim» dep, duǵa etip ári aqyrette de olardy qorǵashtap, shapaǵat etedi» dedi Bas múftı.
QMDB Tóraǵasy juma namazyn júrgizip, jamaǵatty Paıǵambarǵa laıyq úmbet bolýǵa shaqyryp, elimiz ben jerimizdiń tynyshtyǵyn tilep, jamaǵatpen birge duǵa jasady.
