Bas múftı «Áljan ana» meshitinde juma ýaǵyzyn júrgizdi (FOTO)

Búgin, qasıetti juma kúni Bas múftı Naýryzbaı qajy Taǵanuly «Áljan ana» meshitinde juma qutpasyn oqyp, jamaǵatqa juma ýaǵyzyn júrgizdi.

QMDB Tóraǵasy «Jamaǵatpen qulshylyq etýdiń saýaby» taqyrybynda Islamda musylman adamnyń kópshilikpen birge bolyp, ǵıbadat-qulshylyqtaryn ózge musylmandarmen birge atqarýynyń mańyzy óte úlken ekenin atap ótip, musylman adamnyń jamaǵatpen bir bolýynyń artyqshylyǵyna toqtaldy.

Jamaǵatpen atqarylǵan qulshylyq jeke atqarylǵan qulshylyqtan saýap turǵysynan artyq ekenin, jamaǵatpen qulshylyq etý – ózara birlikte bolýǵa yqpal etetinin, jamaǵatpen birge bolǵan adam, shaıtannyń azǵyrýynan aman bolatynyn jáne de jamaǵatpen namaz oqý musylmandardy tártip pen júıege tárbıeleıtinin tilge tıek etti.

Ýaǵyz sońynda Naýryzbaı qajy Taǵanuly Paıǵambarymyzdyń (oǵan Allanyń salaýaty men sálemi bolsyn): «Jamaǵatpen birge bolý – meıirim, al odan bóliný – azap», – dep aıtqan ósıetin saralap, jınalǵan jamaǵat aldynda elimizge amandyq, bereke-birlik tilep, duǵa jasady.