Bas múftı: Arys oqıǵasy barsha azamatty qaıyrymdylyq isinde biriktirýi tıis

Qazaqstan musylmandary dinı basqarmasynyń tóraǵasy Serikbaı qajy Oraz Arysta bolǵan oqıǵaǵa baılanysty pikir bildirdi.

"Arys qalasyndaǵy №44856 áskerı bóliminiń qoımasynda bolǵan jarylys elimizdiń barsha azamatyn sary ýaıymǵa saldy. Tótenshe jaǵdaı bizdiń de janymyzǵa batty. Halqymyz: "Apat aıtyp kelmeıdi", - deıdi. Allanyń isine amal joq. Kemedeginiń jany bir emes pe? Bul oqıǵa barsha azamatty qaıyrymdylyq isinde biriktirip, baýyrmashyldyǵyn arttyrýy tıis dep sanaımyn. 

Qazir Úkimet qajetti sharalar qabyldaýda. Qazaqstan musylmandary dinı basqarmasy da óz tarapynan qaıyrymdylyq baǵyttaǵy bastamalarǵa úles qosýda. Túrkistan oblysy men Shymkent qalasyndaǵy meshitter turǵyndarǵa tıisti kómek berýde. Ýaqytsha turaqtaý úshin meshit pen medreseler esigi ərqashan ashyq ekenin habarlaımyn.

Búgin Shymkent qalalyq Ortalyq meshitinde 5 myńǵa jýyq adamǵa as-sý berildi. Bul baǵyttaǵy ıgi is-sharalar jalǵasa beredi. 

Alla Taǵala Arys azamattaryna jar bolsyn. Basqa túsken synaqqa sabyr etýin tileımiz. Ata-analar balalarymen qaýyshyp, qýanyshqa bólenýin nəsip etsin. Al túrli deńgeıde jaraqat alǵan jandarǵa Alla shıpasyn bersin. El irgesi bútin, elimiz aman, jurtymyz tynysh bolǵaı. Əmın!" - dep atap ótti Serikbaı qajy Satybaldyuly.