Bas múftı ata-anasyz qalǵan balalarǵa járdemdesti (FOTO)
Qasıetti juma kúni QMDB Tóraǵasy, Bas múftı Naýryzbaı qajy Taǵanuly ata-anasynan aıyrylǵan bes balany zııarat etti.
Qaıyrymdylyq sharasyna QMDB Apparat basshysy Ǵylymbek Jádigeruly, «Zeketjáne qaıyrymdylyq» qorynyń dırektory Talǵat Omarov, Aqparat jáne qoǵammen baılanys bóliminiń meńgerýshisi Marat Bektazınov jáne qordyń mamandary qatysty.
«Ramazan – bul ıgi isterdi molynan jasaıtyn aı. Bul aıda saýaptar eselenedi. Jetimdik te – Allanyń synaǵy. Paıǵambarymyzdyń (oǵan Allanyń salaýaty men sálemi bolsyn) ózi ata-anasyz ósti. Myna dúnıege ony Alla Taǵala raqym etip jiberdi. Mine árbir synaqqa moıymaı, kerisinshe kúrese bilý kerek. Dinı basqarma janyndaǵy «Zeket» qory ózderińe kómektesip keledi eken. Dinimizde zeket berýdiń mańyzy zor. Alla Taǵala senderdiń de zeket berip, sadaqa jasaıtyndaı jaǵdaıǵa jetýlerińdi násip etsin» dep batasyn berdi Bas múftı.
Ramazan aıynda «Zeket jáne qaıyrymdylyq» qory asyraýshysynan aıyrylǵan otbasyna azyq-túlik, qajetti kıim-keshek jetkizdi. Qor dırektory Talǵat Omarovtyń sózinshe sońǵy 3 jylda balalardyń qysqy-jazdyq kıimderi, ortanshy ul Nurdáýlettiń oqý aqysyn tóleý, aılyq azyq-túligin jetkizý de qordyń úlesinde eken. Ákesi dúnıeden ozǵan soń anasyna bul páter jaldamaly retinde berilgen. Keıin bes bala ata-anasyz qalǵan soń páter tolyǵymen berilipti. Degenmen qajetti jıhazdyń bárin «Zeket jáne qaıyrymdylyq» qory jetkizip bergen.
