Bas múftı Atyraý ımamdaryna nasıhatyn jetkizdi (FOTO)
Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Atyraý oblysynyń ımamdaryn qabyldady.
Kezdesýde Atyraý oblysynyń bas ımamy Altynbek Utyshanuly óńirdegi dinı ahýaldy baıandap, úgit-nasıhat, oqý-aǵartý, dinı ońaltý, qaıyrymdylyq, aqparat, t.b. baǵyttar boıynsha oblys kóleminde atqarylyp jatqan jumystar týraly Bas múftıge esep berdi.
Búginde atalǵan aımaqta 32 meshitte 74 din qyzmetkeri jumys isteýde. Jańadan 5 meshit salynýda. Medıa josparǵa sáıkes, 177 shákirt meshit ımamdarynan turaqty túrde onlaın dáris tyńdaıdy.
«Júıeli jumystyń nátıjesinde osy jyly 5 shákirtimiz Nur-Múbárak ýnıversıtetine, 48 shákirtimiz respýblıkalyq deńgeıdegi medrese-kolledjderge oqýǵa tústi. «El úlesi – páterge» qaıyrymdylyq jobasy aıasynda baspanaǵa asa muqtaj 10 januıaǵa páter kiltin tabystadyq. Sonymen qatar aldaǵy ýaqytta 3 Qaıyrymdylyq mekemesin ashý josparymyzda bar», – dep atap ótti bas ımam Altynbek Utyshanuly.
Aımaqta atqarylyp jatqan jumystarǵa oń pikirin bildirip, ıgi tilegin jetkizgen Bas múftı Naýryzbaı qajy Taǵanuly: «Siz talaı jyl múftııatta qyzmet etip, mol tájirıbe jınadyńyz. Respýblıkalyq sharalarǵa uıytqy boldyńyz. Atyraý oblysynyń bas ımamy retinde de ıgi ister atqaryp kelesiz. Barlyq bastamalaryńyzǵa sáttilik tileımin. Alla jar bolsyn! Eń bastysy, Alla razylyǵy úshin qyzmet etińizder. Halyqpen jumys jasaý barysynda kórkem ádep saqtap, meıirimdilik jolyn ustanyńyzdar. Meshitke kelgen ár adamǵa kóńil bólip, múmkindiginshe kómektesińizder. Eger sizderdiń sebepterińizben bir adam ımandylyq jolyna túsip, otbasyn jaqsylyqqa uıytyp, aınalasyna úlgili tulǵa bolsa, onyń saýaby men taǵylymynda shek bolmaıdy. Halyqqa qyzmet etýden asqan ǵazız nárse joq. Sondyqtan el ıgiligi úshin aıanbaı eńbek ete berińizder», – dedi.
Kezdesý sońynda Bas múftı óńir ımamdarymen ashyq suhbat quryp, tıisti aqyl-keńesin jetkizdi.
