Bas múftı Atyraý oblysy ákimimen kezdesti (FOTO)
Búgin QMDB Tóraǵasy, Bas múftı Naýryzbaı qajy Taǵanuly jumys saparymen Atyraý oblysyna keldi.
Sapar aıasynda Bas múftı Atyraý oblysynyń ákimi Mahambet Dosmuhambetovpen kezdesti. Kezdesý barysynda taraptar óńirdegi dinı ahýal, pandemııa kezindegi aımaqtaǵy dinı oryndardyń qyzmeti, dinı kadr daıarlaý, teris aǵymdarmen kúres máselelerin talqylady.
«Pandemııa kezinde Dinı basqarmaǵa qarasty meshitter jumysyn jańa formatta jalǵastyrdy. Zamanaýı tehnologııa múmkindigin paıdalaný arqyly halqymyzǵa qoldaý bildirdik. Ýaǵyz-nasıhattar onlaın formatqa kóshti. Meshit esikteri jabylǵanymen, saýap esikteri jabylmady. Qaıyrymdylyq baǵytyndaǵy sharalar kúsheıtildi. Sonymen birge múftııat birqatar mańyzdy qujattar qabyldady. Pandemııa jaǵdaıynda janaza shyǵarý, as berý rásiminiń arnaıy tártibi bekitildi. Meshitterimizde azan toqtatylmady, Quran hatym jasalyp, qurbandyqtar shalyndy. Halqymyzdyń birliginiń arqasynda bul synaqtan da aman óttik», – dep atap ótti Naýryzbaı qajy Taǵanuly.
Kezdesý barysynda Atyraý oblysynyń ákimi Mahambet Dosmuhambetov asyl dinimizdi dáripteý, el birligin nyǵaıtý jolynda eńbek etip jatqan Qazaqstan musylmandary dinı basqarmasyna alǵysyn jetkizdi. «Barshamyzdyń atqaryp júrgen eńbegimiz ortaq. Maqsatymyz – elimizdiń birligin, amandyǵyn saqtaý, ál-aýqatyn nyǵaıtý» degen oblys ákimi dinı kadr daıarlaý máselesinde jergilikti atqarýshy bılik tarapynan qoldaý jalǵasatynyn aıtty.
