BAS MÚFTI «ÁZIRET SULTAN» MEShITINDE JUMA ÝAǴYZYN AITTY (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordasy Astana qalasyndaǵy «Áziret Sultan» meshitinde juma ýaǵyzyn aıtty.
«Qanaǵat qaryn toıǵyzar» taqyrybynda ýaǵyz aıtqan Bas múftı: «Dinimiz musylman adamnyń boıynda tabylýy tıis rýhanı qasıetterge shaqyrady. Osy rýhanı qasıetterdiń biri – qanaǵat. Qanaǵat qolyńdaǵy barǵa razy bolý, shúkirshilik etý, sondaı-aq nápsi qalaýlarynan tyıylý, shydaý degen sóz. Al qanaǵat sóziniń sharıǵattaǵy dinı termındik maǵynasy – Alla Taǵaladan ózge eshkimnen, eshteńe dámetpeý. Iaǵnı tek Alladan ǵana úmit etip, rızyq-nesibesine razy bolý. Jaratqan Alla Taǵala qasıetti Quran Kárimniń «Nahl» súresi, 97-aıatynda: «Qandaıda múmın er nemese áıel kisi túzý (izgi) is istese, biz oǵan mindetti túrde jaqsy ómir (tirshilik) syılaımyz. Ári biz olarǵa istegen isterinen de jaqsyraq syılyq beremiz», – dep aıtqan.
Ǵalymdarymyz osy aıattaǵy «Jaqsy ómir syılaımyz» degen sózdi «qanaǵat etken tirshilik» dep anyqtama bergen. Demek, qanaǵat etken kisiniń ómiri jaqsylyqqa, izgilikke toly bolady degen sóz.Qazaq halqynda da qanaǵat týraly ónegeli ósıetter kóp saqtalǵan. Aıtalyq, «Qanaǵat qaryn toıǵyzar, qanaǵatsyz jalǵyz atyn soıǵyzar», «Er azyǵy – qanaǵat» syndy maqal-mátelder halqymyzdyń rýhanı jadynda máńgi saqtalyp keledi» dedi.
Juma namazynan keıin QMDB Tóraǵasy Naýryzbaı qajy Taǵanuly el amandyǵy men ıgiligi úshin duǵa jasady.
