BAS MÚFTI AZYQ-TÚLIK QAÝIPSIZDIGI JÓNINDEGI ISLAM UIYMYNYŃ BAS DIREKTORY BERIK ARYNMEN KEZDESTI

QMDB Ortalyq ǵımaratynda Bas múftı Naýryzbaı qajy Taǵanuly Azyq-túlik qaýipsizdigi jónindegi Islam uıymynyń bas dırektory Berik Arynmen kezdesti.

Eń aldymen Bas múftı Berik Saqbaıulyn jańa qyzmetimen quttyqtap, tabys tiledi.

«Ózińizben birneshe jyldan beri áriptestik baǵytta qyzmet etip kelemiz. Mysyrda Elshi bolǵan kezińizde rýhanı baǵytta aýyz toltyryp aıtarlyqtaı aýqymdy isterge uıytqy boldyńyz. Musylman elderiniń birligi jolynda kóptegen jumystar atqaryldy. Memlekettik qyzmette de Ózińizben rýhanı baǵytta birneshe jobalardy júzege asyrdyq. Qazirgi jańa qyzmetińizge tabys tileı otyryp, baılanysymyz toqtamaıdy» dep senemin dedi Naýryzbaı qajy Taǵanuly.

Bas múftıge alǵysyn bildirgen Berik Saqbaıuly óz kezeginde qazirgi qyzmette de dinaralyq tatýlyq turǵysynan ıslam elderimen tyǵyz baılanysta ekenin jetkizdi.

«Árıne Ózińiz basqaryp otyrǵan ujymmen jan-jaqty jumys atqardyq. Mysyr elinde dinı bilim, Saýd Arabııada qajylyq maýsymyn atqarý bir júıege tústi deýge bolady. Islam uıymy bolǵandyqtan Sizdermen árkez baılanysta bolamyz. Qolǵa alyp jatqan birneshe ózekti jobamyz bar. Onyń biri árıne azyq-túlikti saqtaý, ysyrapqa barmaý, azyq-túlikpen barynsha joq-jitikke qaraılasý jaǵyn da qolǵa alýdamyz. Adal asty damytý jaǵy da nazarymyzda. Sondyqtan Dinı basqarmamen birlesip jumys isteýge daıynbyz» dedi Azyq-túlik qaýipsizdigi jónindegi Islam uıymynyń bas dırektory Berik Aryn.

Kezdesý sońynda taraptar ekijaqty ortaq jobalardy qoldaıtynyn málimdedi.

​