Bas múftı «Baqytty shańyraq» qoryna kómek kórsetti (FOTO)
Ramazan aıynyń sońǵy kúni QMDB Tóraǵasy, Bas múftı Naýryzbaı qajy Taǵanuly «Baqytty shańyraq» múgedektigi bar bala tárbıeleıtin otbasylar qoryna arnaıy bardy. «Zeket jáne qaıyrymdylyq» qorynyń uıymdastyrýymen ortalyq qyzmetkerlerine Oraza Aıt syılyǵy úlestirildi.
«Baqytty shańyraq» atty kópsalaly halyqqa qyzmet kórsetý ortalyǵynyń negizin qalaýshy Botakóz Sultanovanyń ótinishine saı 50 sómke azyq-túlik jetkizildi.
Bas múftı bastaǵan Dinı basqarma ujymy aldymen «Baqytty shańyraq» qorynyń jumysymen tanysyp, qasıetti aıdaǵy nasıhatyn jetkizdi.
«Qazirgi qoǵamǵa rýhanııat, mádenı bilim qajet. Adamǵa meıirim kerek. Bir jyly sózdiń ózi qýantady. Islam dini – meıirim dini. Bir adamdy qýanta bilsek qandaı baqyt. Aınalamyzǵa shattyq syılap, mádenıettiń úlgisin kórsete bilsek qoǵamǵa paıdamyz tıedi. Sizder synaqqa moıymaı ári jumys istep ári balaǵa qarap otyrsyzdar. Buǵan úlken kúsh kerek. Alla jar bolsyn. Oraza qabyl bolsyn!» - dep, ortalyqtaǵy analarǵa aq batasyn berdi.
«Baqytty shańyraq» qorynyń negizin qalaýshy Botakóz Sultanovanyń aıtýynsha ortalyqta 13 túrli qyzmet kórsetiledi.
«Qorda 380 otbasy bar. 900 balanyń 400-i múgedek. Al jalpy alǵanda qorǵa qarasty 2100 adam bar. Maqsatymyz osyndaı túrli toptaǵy múgedek balalardy tárbıelep otyrǵa analarǵa jumys taýyp berý ári olardy oqytý. Bolashaqta óziniń jeke bıznesin ashýǵa da járdemdesemiz. Búgin Dinı basqarma tarapynan kórsetilgen kómek úshin Sizderge sheksiz rızamyz», - dedi B.Sultanova.
Aıta keteıik búgingi erekshe balalardyń ata-analaryna kómek kórsetý, qoldaý jáne damytý qorynda ótken ıgi sharaǵa QMDB Tóraǵasynyń orynbasary, naıb múftı Ershat Aǵybaıuly, Apparat basshysy Ǵylymbek Jádigeruly, «Zeket jáne qaıyrymdylyq» qorynyń basshysy Talǵat Seıitkárimuly, Aqparat jáne qoǵammen baılanys bóliminiń meńgerýshisi Marat Bektazınov qatysty.
