Bas múftı bólim basshylarynyń jumys esebin tyńdady (FOTO)
Elordada Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń kezekti Apparat jınalysy ótti. Onda mamyr-tamyz aılarynda atqarylǵan bólim basshylarynyń jumys esebi tyńdaldy.
Eń aldymen Aqparat jáne qoǵammen baılanys bóliminiń meńgerýshisi Marat Bektazınov mamyr-tamyz aılarynda aqparat taratý men qoǵammen baılanys baǵytyndaǵy jumystar jóninde esep berdi.
«Eseptik kezeńde www.muftyat.kz saıtyna 1292 materıal júkteldi. Atap aıtqanda 914 jańalyq, 57 maqala, 105 vıdeo, 180 foto banner jáne 36 suraq-jaýap jarııalandy. Dinı basqarmaǵa qarasty Mýftııat jáne Hikmet TV Youtube arnasyna 237 vıdeomaterıal júkteldi. «Munara TV» telearnasy iske qosylyp, otandyq aqparat taratý keńistigindegi «Otaý TV», «ID TV» jelilerine qosyldy. Dástúrli Islam dinin nasıhattaý barysynda qańtar aıynan bastap rýhanı mánge ıe 12 aptalyq uıymdastyryldy. Atap aıtqanda: «Alash», «Islam jáne otbasy», «Kemel adam», «Dostyq», «Jaqsy sóz», «Ihsan – rýhanı tárbıe negizi», «Namaz – din tiregi», «Qasıeti mol qurban aıt», «Keshirim», «Bilim» aptalyqtary. Aptalyq barysynda 147 materıal jaryq kórdi. Naqtyraq aıtqanda, 70 áleýmettik kartınkalar, 18 maqala, 16 aptalyqqa baılanysty áleýmettik rolıkter, 8 «Sársenbilik suhbat», 35 flesh-banner jarııalandy. QMDB-ǵa qarasty 19 ókildik saıttaryna jalpy sany 6 505 materıal salyndy. Onyń ishinde 660 maqala, 1 100 jańalyq, 3 241 suraq-jaýap, 764 onlaın dáris jáne 800 vıdeo bar» dedi Marat Dálelhanuly.
Sharıǵat jáne pátýa bólimi meńgerýshisiniń orynbasary Hasan Amanquldyń aıtýynsha respýblıka boıynsha pátýa mamandary, Dinı basqarma men óńir meshitterindegi aqparat berý call ortalyqtary mamyr-maýsym aılarynda 11 myńnan astam suraqqa jaýap berse, shilde jáne tamyz aılarynda 9111 jáne 9504 suraqqa jaýap bergen. Bıylǵy Qurban aıt merekesi jaz aılaryna dóp kelgendikten, suraqtardyń deni ǵıbadatqa, sonyń ishinde qurban shalý men aıt namazyna qatysty kelip túsken.
«Eseptik kezeńde QMDB Ǵulamalar keńesi 10 pátýany qabyldap, «Munara» gazeti men Dinı basqarmanyń resmı saıtyna jarııalandy. Olardyń qatarynda «Zeketti meshit shyǵyndaryna qoldaný úkimi», «Dinı basqarmanyń LGBT-ǵa qatysty úkimi», «Paraqorlyqtyń sharıǵı úkimi», «Jalǵa alǵan múlikti jalǵa berý úkimi» sekildi kóptiń kókeıinde júrgen kúrdeli máseleler bar» dedi Hasan Amanqul.
Dinı bilim jáne kadr daıarlaý bóliminiń meńgerýshisi Smaıyl Seıitbekovtiń aıtýynsha, sońǵy tórt aıda respýblıka boıynsha 13683 adam saýat ashý kýrstaryna qatyssa, 2949 ımam biliktilikti arttyrý semınarlary men kýrstarynan ótken. Sondaı-aq jaz aılarynda 154 din qyzmetkeri jumysqa ornalasypty.
Ýaǵyz-nasıhat bóliminiń meńgerýshisi Batyrjan Mansurov mamyr men tamyz aılary aralyǵynda jalpy sany 6773 medıa ýaǵyz-nasıhat júrgizilip, 3 501 713 adam qamtylǵanyn atap ótti. Odan ózge bólimge qarasty Jastar isi jáne Áıel-qyzdar sektorynyń 4 aıda atqarǵan jumystaryna toqtaldy.
«Jastar isi sektorynyń uıymdastyrýymen 12 tamyz Halyqaralyq jastar kúnine oraı «Jastyq shaqtaǵy kemeldilik» onlaın semınar-trenıngi, «Salaýatty jamaǵat» atty túrli formatta sporttyq oıyndar ótti. Tórt aıda barlyǵy 2 844 shara atqarylyp, 65 050 adam qamtyldy. Al Áıel-qyzdar sektory tórt aıda 2879 is-shara uıymdastyrsa, oǵan 9 816 adam qatysty» dedi Batyrjan Berdenuly.
QMDB-ǵa qarasty din qyzmetkerleri mamyr-tamyz aılarynda 10 kitap daıyndap shyqty. Bul týraly apparat jınalysynda «Mýftııat» baspasynyń dırektory Murat Ábdihalyqov málimdedi.
«Mamyr aıynda Shymkent qalasynda «Bas múftı taǵylymy», Pavlodar oblysynda «Júrektiń kózi ashylsa» jáne tárbıege qatysty «Q.A.Iassaýı hám Ihsan ilimi», «Imam Ǵazalı hám Ihsan ilimi» kitaptary jaryq kórdi. Sonymen qatar osy aralyqta, saıttarda, Respýblıkalyq, oblystyq, aýdandyq gazetterde, ıhsan ilimine qatysty 1119 maqala jazyldy. Áleýmettik jelilerde 2506 jazba-ınfografıka, 1862 ýaǵyz-dáris taspalanyp jelilerge salyndy. Sondaı-aq, onlaın, oflaın 722 is-shara ótti» dedi Murat Manapuly.
Jıyn sońynda QMDB Tóraǵasy Naýryzbaı qajy Taǵanuly bólim basshylaryna naqty tapsyrmalar berip, tórt aıda atqarylǵan jumystardy odan ary jalǵastyrý qajettigin jetkizdi. Sondaı-aq Bas múftı Dinı basqarmanyń «Munara TV» tól telearnasynyń jumysyn jandandyrýdy tapsyrdy.
