BAS MÚFTI «BÓLIM SAǴATYN» ÓTKIZDI (FOTO)

Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń tóraǵalyǵymen «Bólim saǵaty» jobasy boıynsha Apparat jınalysy ótti.

Jıynda Qazaqstan musylmandary dinı basqarmasynyń Qajylyq bólimi, «Tawaf Travel» qajylyq fırmasy jáne «Darhan Dala» mekemesiniń atqarǵan jumystary jaıly esep berildi. Odan bólek Qajylyq bóliminiń meńgerýshisi Jándillá Bekjigitov pen  «Tawaf Travel» qajylyq fırmasy jáne «Darhan Dala» mekemesiniń dırektory aldaǵy ýaqytta júzege asatyn jobalar jaıly da baıandady.

«Islamnyń bes tireginiń biri – qajylyq desek, otandastarymyzdyń qajylyq qulshylyǵyn oıdaǵydaı atqaryp, rýhanı kemeldenip kelýine din qyzmetkerleriniń úlesi zor ekeni belgili. Bıylǵy qajylyq maýsymy, tipti onyń daıyndyǵy da burynǵydan ózgerek bolyp tur. Sondyqtan bıyl baratyn otandastarymyzdyń daıyndyǵyna kóp kóńil bólýimiz kerek. Dinı basqarmanyń Qajylyq bólimi, «Tawaf Travel» qajylyq fırmasy jáne «Darhan Dala» mekemesiniń atqaryp otyrǵan jumysynan habardarmyz. Bul salada da jyldan-jylǵa damyp kele jatqanymyzdy byltyrǵy úlken qajylyqta kýá boldyq. Jetildire túsetin tustar da bar, árıne. Eń bastysy, qajylyqqa baratyn qandastarymyzdy, el ishindegi tarıhı oryndarǵa saıahattaıtyn otandastarymyzdy aman-esen aparyp-ákelý, sharıǵatqa saı qulshylyǵyn, zııaratyn jasap, rýhanııaty kóterilip kelýin qamtamasyz etýge tıispiz» dedi Bas múftı.

Jıynda QMDB qyzmetkerleri Qajylyq bólimi, «Tawaf Travel» qajylyq fırmasy jáne «Darhan Dala» mekemesiniń jumysyn jetildirý boıynsha óz oılary men pikirlerin ortaǵa saldy. 

​

Источник: Aidos