Bas múftı: Dinı basqarma «Darhan dala» jobasyn iske qosty (FOTO)

Bul týraly búgin Túrkistan oblysyna resmı saparmen barǵan Bas múftı Naýryzbaı qajy Taǵanuly oblystyq óńirlik kommýnıkatsııalar qyzmetinde ótken brıfıngte málimdedi.

«Qazaqstan musylmandary dinı basqarmasy otandyq týrızmdi damytýǵa úles qosý maqsatynda «Darhan Dala» jobasyn iske qosty. Joba maqsaty – halyq arasynda din men dástúrimizge saı kıeli oryndardy zııarat etý mádenıetin qalyptastyrý, jurtshylyqqa sharıǵat ádebin saqtaýdy úıretý, Túrkistan qalasyna, basqa da tarıhı, kıeli oryndarǵa týr uıymdastyrý. Atalǵan jobany QMDB janyndaǵy «Darhan Dala Travel» týrıstik fırmasy ımamdardyń atsalysýymen júzege asyrady.

Keıde kıeli oryndarǵa zııarat jasaý rásimderi kezinde sharıǵat talaptary saqtala bermeıdi. Qazaqstan musylmandary dinı basqarmasy osy máselege nazar aýdaryp, ótken jyly ımamdar forýmynda «Zırat jáne zııarat mádenıeti» qujatyn qabyldady. Maqsatymyz – elimizde jalpyǵa birdeı zııarat mádenıetin qalyptastyrý jáne zııarat jasaý kezinde sharıǵat ádebin saqtaýdy qadaǵalaý», - dedi Naýryzbaı qajy Taǵanuly.

Aıta ketsek, «Darhan Dala Travel» týrıstik fırmasy birneshe baǵyt boıynsha jumys isteıdi. Atap aıtqanda, sheteldegi jáne elimizdegi kıeli oryndarǵa zııarat, densaýlyq, Ekotýrızm baǵyty boıynsha arnaıy sapar uıymdastyrady.

Brıfıng barysynda Bas múftı jergilikti jýrnalısterdiń suraqtaryna jaýap berdi.