Bas múftı dinı basqarmanyń Mysyrdaǵy jaýapty ókilin qabyldady (FOTO)
Elordada QMDB Tóraǵasy, Bas múftı Naýryzbaı qajy Taǵanuly Dinı basqarmanyń Mysyr Arab Respýblıkasyndaǵy jaýapty ókili Rýslan Serǵazıevti qabyldady.
Kezdesýde Bas múftı Mysyrdaǵy jaýapty ókildiń jumys josparymen tanysyp, baǵyt-baǵdar berdi.
«Birer aı buryn Mysyr jerine jolymyz túsip, halyqaralyq deńgeıdegi is-sharalarǵa qatysyp qaıttyq. Kaırde oqyp jatqan shákirttermen júzdesip, jaǵdaılaryn bildik. Ózińizdi «bilimniń qubylasy» atanǵan áıgili ál-Azhar ýnıversıteti men Qazaqstan musylmandary dinı basqarmasy arasyndaǵy altyn kópir bolsyn degen senimmen jaýapty ókil etip taǵaıyndadym. Sol kezde de aıtqanymdaı, Dinı basqarma shetelde oqyp jatqan shákirtterdi rýhanı hám áleýmettik turǵydan qoldaý kórsetýge árqashan daıyn. Barshasyn Mysyr elinde tolyqqandy bilim alyp, elge oralyp, qoǵam ıgiligi úshin qyzmet etýge shaqyramyn. Bilimdi, zııatker jastardyń elge qyzmet etýi bizdegi kadr áleýetin arttyra túspek. Ózińniń de din jolyndaǵy qyzmetińe bereke tileımin» dedi Naýryzbaı qajy Taǵanuly.
Óz kezeginde Rýslan Amantursynuly Bas múftıge Kaırdegi shákirtterge kórsetip otyrǵan qoldaýy úshin alǵys aıtyp, stýdentterdiń sálemin jetkizdi. El Táýelsizdiginiń 30 jyldyǵy, Ramazan aıy, Oraza men Qurban aıt merekelerinde atqarylatyn taǵylymdy is-sharalar týraly baıandap, aldaǵy ýaqytta da «Talaba» qaýymdastyǵynyń jumysyn jetildirýge atsalysatynyn tilge tıek etti.
Esterińizde bolsa, Bas múftı naýryz aıynda Mysyr Arab Respýblıkasyna jasaǵan resmı sapary barysynda Kaırde oqyp jatqan qazaqstandyq stýdenttermen júzdesip, suhbattasqan bolatyn. Sondaı-aq «Talaba» qaýymdastyǵynyń shákirtterine táýelsizdigimizdiń 30 jyldyq mereıtoıyna oraı 1 mln teńge qaıyrymdylyq kómek kórsetken edi.
