BAS MÚFTI DINI OQÝ ORYNDARYNYŃ DIREKTORLARYMEN KEZDESTI (FOTO)
Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly múftııatqa qarasty oqý oryndarynyń basshylarymen kezdesti.
Atap aıtqanda, jıynǵa elimizdegi 9 medrese-kolledj ben 10 qarılar ortalyǵynyń, sondaı-aq Hýsamýddın as-Syǵanaqı atyndaǵy Islam ınstıtýtynyń Astana jáne Almaty qalasyndaǵy ıjaza berý ortalyqtarynyń dırektorlary qatysty.
«Ózderińizge málim, Qazaqstan musylmandary dinı basqarmasynyń negizgi maqsatynyń biri – asyl dinimizdi nasıhattaıtyn, dinı rásimderdi sharaıǵat talabyna saı atqaratyn maman daıyndaý. Dinı basqarma maman daıyndaý úshin barlyq múmkindikti jasap keledi. Degenmen ýaqyt ótken saıyn qoǵam damyp, talap kúsheıip barady. Qaı zaman bolmasyn bilimdi mamanǵa degen suranys bolatyny belgili. Dinı basqarma zamana talabynan qalmaı maman daıyndaýǵa nazar aýdarýda. Árıne qyzmet barysynda túrli qıynshylyqtar kezdesedi. Sizder sol qıyndyqtarǵa moıymaı, eńselerińizdi túsirmeı, dinniń abyroıyn kóterý úshin barynsha qyzmet etip kelesizder. Sondyqtan barshańyzǵa rııasyz alǵysymdy bildiremin. Alla qyzmetterińizge razy bolǵaı» dedi Bas múftı.
Naýryzbaı qajy Taǵanuly dinı oqý oryndarynyń basshylarymen birge kún tártibinde turǵan máselelerdi talqylap, bolashaq din mamandaryn daıyndaýǵa qatysty keńesterin jetkizdi.
Aıta keteıik, sońǵy 17 jyl ishinde 9 medrese-kolledjdi 3 539 túlek bitirip shyqty. Onyń 2 677-i er bala, 862-i qyz bala. Al qazirgi tańda atalǵan medrese qabyrǵasynda jalpy 2 599 stýdent bilim alýda. Onyń 472-si bıyl bitiredi dep josparlanýda.
