Bas múftı Eskendir Hasanǵalıevtiń týystaryna kóńil aıtty

QMDB Tóraǵasy, Bas Naýryzbaı qajy Taǵanuly elge belgili kompozıtor, Memlekettik syılyqtyń ıegeri, Qazaqstannyń halyq artısi Eskendir Hasanǵalıevtiń dúnıeden ótýine baılanysty otbasy men týystaryna kóńil aıtyp, jedelhat joldady.

«Eskendir Ótegenulynyń qazasy barsha ónersúıer qaýymnyń qabyrǵasyn qaıystyrdy. Aǵamyz kompozıtorlyǵymen de, ánshiligimen de eldiń yqylasyna bólengen, abzal jan edi. Qazaq mýzykasynyń qaryshtaýy úshin ter tókti. Óner men mádenıettiń órkendeýine bir kisideı atsalysty. Qanshama ǵajap ánder qaldyrdy. Ásirese ol kisiniń «Atameken», «Anaǵa sálem», «Aınalaıyn», «Ádemi-aý», «Gúlsezim» sekildi ánderi tyńdarmannyń júregin terbetken, eskirmeıtin, óshpeıtin ánderge aınaldy.

Eskendir aǵamyzdyń jarqyn beınesi men óshpes izi umytylmaıdy. Urpaqtar jadynda saqtalyp, jańǵyra beredi dep bilemiz. Alla Taǵala aǵamyzdy raqymyna bólesin, otbasy men týystaryna sabyr bersin!» delingen kóńil aıtý jedelhatynda.