Bas múftı Frantsııa elshisimen kezdesti (FOTO)

Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Frantsııanyń elimizdegi elshisi Dıde Kanesspen kezdesti.

Basqosýda Bas múftı elshige elimizde dinı salada atqarylyp jatqan is-sharalar, oqý-aǵartý boıynsha júzege asqan ıgi jobalar, meshit-medreselerdiń jumysy týraly aıtyp berdi. Óz kezeginde elshi Dıde Kaness Frantsııadaǵy dinı ahýal, adam quqyǵy men bostandyǵy jaıly Bas múftıdi habardar etti.

Taraptar halyqtyń dinı tatýlyǵy men dostyq qarym-qatynasyn nyǵaıtýdyń, sonymen qatar, osy baǵytta ózara yntymaqtastyqty arttyrýdyń mańyzy jaıly pikir alysty. Naýryzbaı qajy Taǵanuly dúnıejúzi halyqtaryn birlik pen beıbitshilikke úndep kele jatqan Qazaqstanda ótetin Álemdik jáne dástúrli din lıderleri seziniń rólin aıryqsha atap ótti. Elshi atalǵan halyqaralyq basqosýǵa Frantsııa tarapynan delegatsııa keletinin, osy baǵytta arnaıy kelissózder júrip jatqanyn jetkizdi.

Basqosý sońynda Bas múftı mártebeli meımanǵa káde-syı tartý etti.