Bas múftı Hikmet TV arnasy arqyly juma nasıhatyn aıtty (VIDEO)

Búgin QMDB Tóraǵasy, Bas múftı Naýryzbaı qajy Taǵanuly HIKMET TV arnasynyń Youtube jelisindegi kanalynan «Ýaqytty tıimdi paıdalaný» taqyrybynda nasıhat aıtty.

Naýryzbaı qajy Taǵanuly «Árbir adamnyń jaryq kúni sanaýly. Sondyqtan biz ýaqytqa táýeldimiz. Ýaqytty qalaǵan kezimizde uzartyp, qysqarta almaımyz. Onyń ólshemi Uly Jaratýshynyń quzyrynda» deı kele, jer betindegi barlyq nárseniń pánı ekenin eske salyp, ýaqyttyń qadirin bilýge shaqyrdy.

«Ýaqyt aldynda musylmannyń eki mindeti bar. Birinshisi – ýaqytty júıeleý, ekinshisi – bos ýaqytty tıimdi paıdalaný» deı kele Bas múftı eki nyǵmet – densaýlyq pen ýaqytty paıdaly iske jumsaý qajettigine mán berdi.

Sóz sońynda QMDB Tóraǵasy jurtshylyqty Shaǵban aıynyń kirýimen quttyqtap, qazirgi tótenshe jaǵdaıdyń aıaqtalyp, meshitterde jamaǵatpen birge namaz oqyp, burynǵy mamyrajaı kúnge tezirek jetýge duǵa etti.