BAS MÚFTI ISLAM ǴYLYMI-ZERTTEÝ INSTITÝTYNYŃ AShYLÝYNA QATYSTY
Búgin Almatyda Qazaqstan musylmandary dinı basqarmasy janyndaǵy Islam ǵylymı-zertteý ınstıtýty ashyldy. Saltanatty rásimge Bas múftı Naýryzbaı qajy Taǵanuly arnaıy qatysty.
Igi shara qasıetti Quran aıattaryn oqýmen bastalyp, QMDB Tóraǵasy el amandyǵy men tynyshtyǵy úshin duǵa jasap, jańa bastamaǵa bereke tiledi.
«Ózderińiz jaqsy bilesizder, Memleket basshysy qadirli Qasym-Jomart Kemeluly Úkimet múshelerimen ótken basqosýda: «Halqymyzdyń dúnıetanymyna saı dástúrli Islamdy dáripteý asa mańyzdy. Onyń ǵylymı-teorııalyq negizin damytý qajet...» degen bolatyn. Prezıdentimiz mańyz bergen baǵyt boıynsha dástúrli dinimizdiń asyl qundylyqtaryn ǵylymı-teorııalyq turǵydan damytý, ata-babalarymyz ustanǵan ıslamnyń súnnıttik baǵyttaǵy hanafı mázhabyn jańǵyrtý maqsatynda jyl basynda QMDB janyndaǵy Islam ǵylymı-zertteý ınstıtýty ashýdy josparlaǵan bolatynbyz. Allaǵa shúkir, bul josparymyz da oryndalyp, qýanyshqa kenelip otyrmyz.
Óz kezeginde ınstıtýt ujymy Islam atyn jamylǵan túrli jamaǵattar men aǵymdardyń dinı ustanymdary men jasyryn ıdeıalaryn ǵylymı turǵydan áshkereleýge, sol arqyly elimizdiń tutastyǵy men halqymyzdyń birligine syzat túsiretin qaýip-qaterlerdiń aldyn alýǵa nazar aýdarady» dedi Bas múftı.
Sondaı-aq ınstıtýttyń ashylý rásiminde belgili matematık-ǵalym Asqar Jumadildaev, halyq jazýshysy Smaǵul Elýbaı arnaıy sóz sóılep, ıgi bastamaǵa tabys pen bereke tiledi. Budan keıin saltanatty rásim ótip, sharaǵa qatysýshylar ınstıtýt jumysymen tanysty.
Aıta keteıik, Islam ǵylymı-zertteý ınstıtýtynyń negizgi maqsat-mindeti – ǵasyrlar qoınaýynan jetken rýhanı-dinı kóne qoljazbalar men eski kitaptardy kadıkologııa-mátintanýlyq turǵydan zerdelep, saraptaýǵa, ony ǵylymı aınalymǵa engizýge, búgingi qoǵam suranysyna oraı qaıta jaryqqa shyǵarýǵa úles qosý. Asyl dinimizdiń jalpy adamzattyq qundylyqtarǵa negizdelgen ımanı-senim ekendigin ǵylymı turǵydan negizdeý, Islam órkenıetiniń damýyna úles qosqan ǵalym-ǵulamalarymyzdyń eńbekterin zerdelep, olardyń asyl murasyn halqymyzdyń rýhanı tutastyǵy men yntymaq-birligin nyǵaıtý jolynda keńinen paıdalaný.
