Bas múftı Islam zertteý ortalyǵynyń kitaphana jumysymen tanysty (FOTO)
QMDB Tóraǵasy, Bas múftı Naýryzbaı qajy Taǵanuly Túrkııadaǵy resmı saparynda Stambuldaǵy «Islam zertteý ortalyǵynyń kitaphanasyn» aralady.
Bas múftı kitaphana dırektorynyń orynbasary professor Ádil Bormen arnaıy kezdesip, elimizde salynatyn Islam akademııasyna qoldaý kórsetý, kóne qoljazbalardyń kóshirmesin alý, sırek kitaptardy elge ákelý jaǵy sóz boldy.
«Árıne, Túrkııa ıslam tarıhyn saqtap, kóne qoljazbalardy búginge jetkizýde kópke úlgi. Árbir qaladaǵy kitaphanasynan tarıhı jádigerge tap bolasyz. San ǵasyrlyq medrese, kóne Qurandar, birneshe júz jyldyqtyń kýási bolǵan kitaphanalar bar. Bul kitaphananyń biz úshin de orny erekshe. Óıtkeni munda Qazaqstannan keletin shákirtterdiń de qarasy kóp. Bul rette de bizdiń shákirtterge degen qamqorlyqtaryńyzdy jyly qabyldaımyz», – dedi Bas múftı ekijaqty bolǵan kezdesýde.
Kezdesýde İSAM basshylyǵy akademııa jumysynan bólek Qazaqstannan keletin shákirtterdiń izdenýine, tarıhı dúnıelermen tanysýyna barynsha kómektesetinin jetkizdi.
Aıta ketsek Islam zertteý ortalyǵynyń kitaphana qorynda búginde 350 myń kitap bar. Atalǵan ortalyqtyń kitaphanasynda tek qana Shyǵystaný, Islam ǵylymı zertteýleri ǵana emes Túrki jurtynyń tarıhy, ádebıeti, mádenıeti men áleýmettik ǵylymdary jaıly mol muralar saqtalǵan. Sondaı-aq, kitaphanada ataqty tulǵalarǵa tán jeke mura qorlary da bar. Taǵy bir mańyzdy tusy 80 myń ǵylymı maqalanyń Elektrondy nusqasy ázirlengen.
