Bas múftı Kaırde elshimen kezdesti (FOTO)
Bas múftı Naýryzbaı qajy Taǵanuly Mysyr Arab Respýblıkasyna jasaǵan resmı sapary barysynda osy eldegi Tótenshe jáne Ókiletti elshimiz Qaırat Lama Sharıfpen kezdesti.
Naýryzbaı qajy Taǵanuly Dinı basqarma janynan qurylǵan «Talaba» qaýymdastyǵynyń jumysyna qoldaý kórsetip kele jatqan elshige aıryqsha alǵysyn bildirdi. Sonymen qatar Dinı basqarma joldamasy boıynsha Kaırde dinı bilim alyp júrgen qazaqstandyq stýdentterge elshilik tarapynan árdaıym qamqorlyq jasalyp kele jatqanyn tilge tıek etti.
«Siz bizdiń halyqaralyq deńgeıdegi bastamalarymyzǵa qoldaý kórsetip, janashyrlyq tanytyp kelesiz. Mysyr múftıimen ortaq kelisimge qol qoıdyq. Ál-Azhar sheıhy Ahmet Taıyp Qazaqstan úshin 50 bilim grantyn bóletin boldy. Kaırdegi Islam zertteý ortalyǵymen yntymaqtastyqty arttyrýǵa ýaǵdalastyq. Osyndaı jetistikke jetýimizge ózińiz bastaǵan elshilik qyzmetkerleri súbeli úles qosty. Sizderge rııasyz rızashylyq nıetimdi jetkizemin» dedi Naýryzbaı qajy Taǵanuly.
Qaırat Lama Sharıf Bas múftıdiń ál-Azhar sheıhymen, Mysyr múftıimen kezdesýin, Islam isteri jónindegi Joǵary keńeste mazmundy baıandama jasaýyn joǵary baǵalap, tarıhı is-sharalar eki eldiń rýhanı baılanysyna oń yqpal etetinin erekshe atap ótti.
