Bas múftı karantın kezindegi nasıhat jumystary týraly baıandady
Álemdik pandemııaǵa baılanysty naýryz aıynan bastap QMDB ımamdary, ǵalym-ustazdary onlaın nasıhat jumystaryna kóshti. Bul jóninde QMDB tóraǵasy, Bas múftı Naýryzbaı qajy Taǵanuly Ortalyq Kommýnıkatsııalar qyzmetinde ótken brıfıngte keńinen toqtaldy.
«Elimizde tótenshe jaǵdaı jarııalanǵan sátten bastap, ımamdarymyz ben din jolyndaǵy ǵalymdarymyz áleýmettik jelilerde kúnine 3 ret tikeleı Efırde ýaǵyz aıtyp, halyqtyń suraqtaryna jaýap berip, túsindirý jumystaryn júrgizip keledi. Sáýir, mamyr, maýsym aılarynda óńirlerde áleýmettik jeliler men YouTube arnasy arqyly 1 500-den astam ýaǵyz aıtyldy.
Múftııatqa qarasty «Munara» dinı-tanymdyq gazeti, HikmetTV tele-radıo stýdııasy, respýblıkalyq jáne aımaqtyq 22 dinı saıt, táýlik boıy eki tilde aqparat beretin respýblıkalyq Call-ortalyq (33-30-30) arqyly halyq arasynda túsindirý jumystaryn júrgizip kelemiz» dedi Bas múftı.
Sonymen birge, QMDB tóraǵasy Múftııatqa qarasty Ǵulamalar keńesi Pandemııa kezinde tarıhı dinı sheshimder shyǵaryp, 12 mańyzdy qujat qabyldaǵanyn da tilge tıek etti.
«Atalǵan qujattar ishinen «QMDB-nyń Qaýipti juqpaly indetten qaıtys bolǵan adamnyń máıitin jerleýge qatysty pátýasyn» aıtýǵa bolady. Atalmysh pátýada janaza namazyna jáne qabir basynda barlyq qatysýshylardy qosqanda 10 kisiden artyq jınalmaýǵa úndedik. Halyqty jınap qonaq asyn ótkizýdi, jerleý rásiminen keıin as berýdi, jetisi, qyrqy, jyly t.b. rásimderdi elimizde indet jaǵdaıy tolyq turaqtalǵanǵa deıin toqtatýǵa shaqyrdyq. Imamdar osy baǵytta túsindirý jumystaryn júrgizýde», - dedi Bas múftı Naýryzbaı qajy Taǵanuly.
