Bas múftı halyqaralyq onlaın konferentsııaǵa qatysty (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Reseı múftıler keńesi, RF musylmandary dinı basqarmasy uıymdastyrǵan «Musylman álemi jahandyq pandemııaǵa qarsy: áleýmettik oqshaýlaný jaǵdaıyndaǵy yntymaqtastyq» atty halyqaralyq onlaın konferentsııaǵa qatysty.
Zoom platformasynda onlaın konferentsııada pandemııa synaqtary, oqshaýlanýǵa májbúr bolǵan musylman qoǵamynyń aldaǵy ýaqyttaǵy amal-áreketi, jańa bastamalardy iske asyrýdyń tıimdi joldary talqylandy. Jıynǵa Arab memleketteri, Ortalyq Azııa men Eýropa elderiniń dinı jetekshileri men, basqa da konfessııalardyń dinı qaıratkerleri qatysty. QMDB Tóraǵasy Naýryzbaı qajy Taǵanuly onlaın konferentsııada baıandama jasady.
«Pandemııa saldarynan meshit esikteri jabyq bolǵanymen, qaıyrymdylyq pen saýap esigi árdaıym ashyq boldy» deı kele Bas múftı Qazaqstan musylmandary dinı basqarmasynyń «Biz – birgemiz, tilegimiz – ortaq» bastamasyna qoldaý bildirip, musylmandardy kúlli adamzattyń amandyǵy úshin bir mezette alaqan jaıyp, duǵa jasaýǵa shaqyrǵan Reseı múftıler keńesiniń tóraǵasy Sheıh Ravıl Gaınýtdınge, Túrkııanyń Din isteri basqarmasynyń tóraǵasy Alı Erbashqa, Ózbekstan musylmandary dinı basqarmasynyń tóraǵasy Ýsmonhon Alımovke, Qyrǵyzstan musylmandary dinı basqarmasynyń tóraǵasy Maqsatbek qajy Toqtomýshevke, Tatarstan múftıi Kamıl haziret Samıgýllınge, basqa da din basshylaryna alǵys aıtty.
Óz kezeginde Sheıh Ravıl Gaınýtdın QMDB Tóraǵasy Naýryzbaı qajy Taǵanulyn pandemııa kezinde jahandyq bastama kóterip, jurtty jumyldyrǵany úshin ystyq yqylasyn jetkizdi. Jıyn sońynda onlaın konferentsııaǵa qatysqan din qaıratkerleri jahandyq juqpaly indet kezinde din jetekshileriniń durys sheshim qabyldap, meshitterdi ýaqytsha japqany, jamaǵattyń densaýlyǵyn oılap, durys pátýa bergeni oń qadam boldy degen baılamǵa keldi.
