BAS MÚFTI HALYQARALYQ QURAN JARYSYNYŃ ÁDILQAZY MÚShELERIMEN KEZDESTI (FOTO)

Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Astana qalasynda 1-2-qarasha kúnderi Qazaqstan Respýblıkasynyń ulttyq merekesi – Respýblıka kúnine oraı tuńǵysh ret ótetin I halyqaralyq Quran jarysynyń ádilqazy múshelerimen kezdesti.

Kezdesýge Osman Sahın (Túrkııa), Jahongır Nematov (Ózbekstan), Maher Faramaýı (Mysyr Arab Respýblıkasy), Abdýlla Álı Álhashmı (Birikken Arab Ámiriligi) jáne ádilqazylar alqasynyń tóraǵasy Ersin Ámire qatysty. Dinı basqarma tóraǵasy sheteldik meımandarǵa alǵysyn bildirip, mańyzdy jarys jaıly aıtyp ótti.

«Eń aldymen Qazaq eline qosh keldińizder. Shaqyrtýymdy qabyl alyp kelgenderińizge rızashylyǵymdy bildiremin. Qazaqstan musylmandary dinı basqarmasynyń eń úlken is-sharasynyń biri - halyqaralyq Quran jarysy. Atalǵan jarysqa álemniń 27 elinen úmitkerler keldi. Eń myqty degen qarılar baq synaǵaly tur. Sondyqtan bul rette salmaq ta, kúsh te sizderge túsetini anyq. Qara qyldy qaq jarǵan ádil sheshimderińizben eldi qýantý násip bolsyn. Sizder, árıne, mundaı úlken jarystardyń belortasynda boldyńyzdar. Álemdegi kóptegen musylman memleketteri Quran jarystaryn ótkizip keledi. Degenmen Qazaq eli de mundaı aıtýly jarysty bıyl alǵash ret qolǵa alyp otyr. Buǵan deıin jyl saıyn respýblıkalyq erler men qyzdar arasynda Quran baıqaýlary ótkizilip keldi. Jýyrda Aqtaý qalasynda HII Respýblıkalyq Quran Kárimdi jatqa jáne mánerlep oqýdan jarys ótti. Tóreshilik jasaýda Alla jar bolsyn sizderge. Meımandos, qonaqjaı Qazaq eline qosh keldińizder», dedi Bas múftı.

Kezdesý barysynda sheteldik ádilqazylar qazaq jerinde ótip jatqan mundaı aıtýly jarysqa qazylyq etý úlken mártebe ári úlken jaýapkershilik ekenin bildirip, jyly lebizderin jetkizdi. Jıyn barysynda naıb múftı Ershat Ońǵar halyqaralyq Quran jarysynyń erejesi týraly tolyq baıandap ótti.

DerekkózDerekkóz: QMDB Baspasóz qyzmeti