Bas múftı konferentsııada baıandama jasady (FOTO)
Búgin Almaty qalasynda ótip jatqan «QAZAQSTANDAǴY «DIN DÚRBELEŃI»: KEŃESTIK BILIKTIŃ DINGE QARSY REPRESSIIaLYQ ShARALARY» respýblıkalyq ǵylymı-tájirıbelik konferentsııasynda Bas múftı Naýryzbaı qajy Taǵanuly baıandama jasady.
QMDB Tóraǵasy Keńes dáýirinde saıası qýǵyn-súrgin qurbany bolǵan din qaıratkerleriniń eren eńbegi men el úshin, din úshin atqarǵan isine toqtalyp, olardyń esimin ulyqtaý qajettigin atap ótti.
«Saıası qýǵyn-súrgin kórgen ult qaımaqtarymyzdyń qatarynda haziretterimiz, ıshandarymyz, ahýndarymyz ben din qyzmetkerleri boldy. Ókinishke qaraı, olar jaıly bylaıǵy jurt bile bermeıdi. Osy tusta Prezıdentimizdiń jarlyǵymen Memlekettik komıssııa qurylyp, onyń janynan qýǵyn kórgen din ókilderin zerttep, aqtaýǵa arnalǵan jumys toby qurylǵany memlekettiń úlken qamqorlyǵy, bizge berilgen múmkindigi dep bilemiz. Bul degenimiz – ǵalymdarymyzǵa din qaıratkerlerin zertteýge dańǵyl jol ashylyp otyr. Aqıqatynda Keńes úkimetiniń ne úshin din qaıratkerlerin qýǵyndaǵany bárimizge aıqyn. Óıtkeni ol zamanda ıshandar men ahýndar ulttyń qaımaqtary bolatyn. Olar meshit pen medrese ashyp, shákirt tárbıelep, din nasıhatyn júrgizýmen ǵana shektelmedi. Olar ult qaıratkerlerin tárbıeledi» deı kele, sol ýaqyttaǵy qazaqtyń tulǵalarynyń kópshiligi medreseden saýat ashyp, ahýn-ıshannan tálim-tárbıe alǵanyna arnaıy toqtaldy.
Bas múftı keńes zamanynda dindi qoǵamdyq ómirden ysyrýdyń barlyq amaly jasalyp, osy baǵytta ıdeologııalyq jospar qurylyp, pármendi túrde din memleket qurylymynan, adamdardyń jeke ómirinen alystatylǵanyn atap ótti.
«Bizdiń tarıhymyzda osyndaı qıyn-qystaý zamandar boldy. Bizdiń endigi maqsat – kelmeske ketken osy bir náýbetti kúnderden sabaq ala otyryp, sol zamannyń taǵdyr taýqymetin arqalaǵan arda azamattarymyz ben taý tulǵalarymyzdy tereńirek tanýymyz qajet. Din qaıratkerlerin ulyqtaý – bárimizdiń ortaq mindetimiz. El arasyndaǵy din qaıratkerleri jaıly aýyzsha jáne jazbasha derekterdi jınaqtap, arhıvterdegi ǵylymı málimetter men qujattardy taýyp, olardyń esimin este qaldyrý úshin jumys isteýimiz kerek. Tarıhı ádilettilikti qalpyna keltirý – bizge amanat» dedi Naýryzbaı qajy Taǵanuly.
Aıta keteıik, konferentsııada tarıhshy ǵalymdar, UǴA akademıkteri, Saıası qýǵyn-súrgin qurbandaryn tolyq aqtaý jónindegi memlekettik komıssııanyń Dástúrli din ókilderin zertteý jumys tobynyń músheleri, QMDB Ǵulamalar keńesiniń músheleri baıandama jasaıdy.
