BAS MÚFTI «MAQTUM SEIIT» MEShITINIŃ AShYLÝYNA QATYSTY (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Syr eline barǵan saparynda Qyzylorda qalasyndaǵy «Maqtum seıit» meshitiniń ashylý rásimine qatysty.

Igi is-sharada jamaǵatty jańa meshittiń ashylýymen quttyqtaǵan Naýryzbaı qajy Taǵanuly: «Meshit – musylman qaýymnyń Jaratýshy Iemizge kirshiksiz qulshylyq jasap, shynaıy táýbege keletin, jabyrqaǵan kóńiline jubanysh tabatyn, arman-tilegin Allaǵa aqtaryp, duǵa tileıtin minájat úıi. Al meshittiń janynan dinı dúnıetanymyn arttyryp, rýhanı bilimin damytyp, tálim alamyn degender úshin tárbıe ordasy. Meshitte otbasylyq keńes berý, bala tárbıesi, tusaý kesý syndy is-sharalar, dárister ótedi. Sondaı-aq meshitter memleket tarapynan qolǵa alynǵan otbasy ınstıtýtyn damytýǵa aıtyrlyqtaı úles qosýda.

Meshit – ómirdiń eń ózekti máseleleri sheshiletin qasıetti oryn. Bir ǵulama «Ómir – meshittiń ishinde, meshit – ómirdiń ishinde» degen eken. Túıindep aıtqanda, meshit pen ómir – egiz uǵym. Rasynda, musylmannyń ómiri meshittiń ishinde. Dúnıe esigin ashqan sátte sábıdiń qulaǵyna azan shaqyrylady. Shildehana, tusaýkeser syndy dinı hám dástúrimizde qalyptasqan rásimder barysynda meshit ımamdary bata berip, duǵa jasaıdy. Qanshama jandar meshitterden kómek alyp, ómirge degen qulshynysy artyp, úmitteri qaıta jalǵanyp jatady. Jolda qalǵandar men qaryzǵa batqandar, naýqastanǵan jandar men kópbalaly otbasylar az da bolsa Alla úıiniń sharapatyna bólenýde. Meshitterde turaqty túrde «Júrek jylýy», «Ómirge úmit syıla», «Mektepke jol» syndy qaıyrymdylyq aktsııalary uıymdastyrylyp keledi. Meshitterimizde ár jyl saıyn 100 myńǵa jýyq oqýshynyń oqýǵa qajetti sómkesi, kıim-keshekteri men oqý quraldary beriledi», – dedi.

Ashylý rásimine qatysqan Qyzylorda qalasynyń ákimi Serik Qojanııazov ıgi tilegin bildirdi.

​