Bas múftı Máýlit keshine qatysty (FOTO)
QMDB Tóraǵasy, Bas múftı Naýryzbaı qajy Taǵanuly Almatyda ótken «Kórkem minez kemeńgeri – Muhammed ﷺ» atty máýlit keshine qatysty.
Rýhanı merekelik keshti Almaty qalasynyń ortalyq meshiti uıymdastyrsa, oǵan zııaly qaýym ókilderi, aqsaqaldar men din qyzmetkerleri, sondaı-aq meshit jamaǵaty men qala turǵyndary qatysty.
Aldymen Bas múftı Naýryzbaı qajy Taǵanuly «Respýblıka saraıyna» jınalǵan kópshilikti múbárak merekemen quttyqtap, Máýlittiń mańyzyna toqtaldy.
«Isi musylman balasy Paıǵambarymyzdyń (oǵan Allanyń salaýaty men sálemi bolsyn) týǵan aıyn asyǵa kútip, rýhanı basqosýlarda Allaǵa madaq, Paıǵambarǵa salaýat aıtady. Mundaı ıgi dástúr bizdiń elde de birneshe jyldan beri jalǵasyn taýyp keledi.
Asyl dinimizde toılanatyn kez kelgen mereke izgilik pen qulshylyqqa, qaıyrymdylyq pen jaqsylyqqa úndeıdi. Alla elshisiniń dúnıege kelgen aıynda oryndalatyn amaldar musylman balasyn taqýalyqqa tárbıeleıdi. Alla Taǵala qasıetti kitabymyz Quranda: «Allaǵa shyn máninde táýekel etip, Aqyret kúninen úmit etem deýshiler úshin jáne Jaratqandy jıi-jıi eske alatyn jandar úshin Allanyń elshisi keremet ónege bola alady» («Ál-Ahzab» súresi, 21-aıat), – degen.
Paıǵambar jolyn ustanǵan musylman qashan da aınalasyna meıirim tanytyp, shýaǵyn shashyp júredi. Bes kúndik ótkinshi ómirde bir-birimizdiń kóńilimizge qaıaý túsirmeı, kerisinshe jyly sózimizdi arnap, jylýlyq syılap, aǵaıyn-týys baýyrlarǵa, barsha adamǵa duǵa jasap, tileýlestik nıetimizdi bildirip júrgenimiz abzal.
Máýlit aıynda barynsha saýapty isterge den qoıyp, qulshylyq jasap, Allanyń razylyǵyn alýǵa asyǵaıyq. Ásirese, Haq elshisine kóbirek salaýat joldaýdy umytpaıyq» – dedi Bas múftı.
Budan keıin aqyn, sazger Jáken Omarov paıǵambarymyzdyń ómirbaıanyn qazaq tilinde jyrlady. Buǵan deıingi máýlit merekelerinde Paıǵambarymyzdyń balalyq shaǵy, odan keıin paıǵambarlyqtyń kelýi, mıǵrajǵa kóterilýi, odan keıin hıjrettiń alǵashqy jyldary men Bádir soǵysy jaıly qazaq tilinde jyrlanǵan edi. Al, bıyl hıjrettiń úshinshi jylynda bolǵan oqıǵalar, Ýhýd soǵysy, hazreti Hamzanyń sheıit bolýyna toqtalyp ótti.
Máýlit merekesine arnaıy jazdyrylǵan «Paıǵambar ónegesi» jáne «Paıǵambarǵa saǵynysh» ánderi alǵash ret shyrqalsa, tanymal ánshiler Aıdar Turǵanbek, Erdos Qanaev, Serjanáli Álibek, Ergen Aıtymbetov, Raıym Ýaıys jáne Jiger Aýypbaevtar ıláhı ánder men termeler oryndap, paıǵambarǵa degen saǵynyshtaryn ánmen jetkizdi.
Ǵabıt Músirepov atyndaǵy Qazaq memlekettik balalar jáne jasóspirimder teatrynyń ártisteri «Kemedegi ıman» jáne «Eń úlken kúres – ózińmen kúres» atty sahnalyq kórinister qoıdy. Bul kórinisterde Allaǵa táýekel etý, teris qylyqtardan aýlaq bolý, durys dos tańdaı bilý, bala tárbıesindegi ata-ananyń roli syndy qoǵamdaǵy basty tárbıe kózi men mándi dúnıeler baıandalǵan.
Sonymen qatar Paıǵambar súnnetin ómirine temirqazyq etip ósip kele jatqan jas jetkinshekter paıǵambarymyz jaıly poEzııa men monolog oqyp, kórermenniń zor yqylasyna bólendi.
Kópshilik kórermen qaýymǵa máýlitten sarqyt retinde «Iman» jýrnaly, «Munara» gazeti men dinı kitaptar salynǵan syı úlestirildi. Shara sońynda Máýlit rýhanı keshiniń bıletterinen túsken qarajat kórermen aldynda kópbalaly analarǵa tabystaldy. Budan bólek Almaty ortalyq meshitiniń turaqty jamaǵaty, taǵdyr taýqymetine tap bolǵan jas jigitke tosyn syı retinde ýmra qajylyǵynyń sertıfıkaty berildi. Din jolynda qyzmet etip júrgen Almaty qalasy ımamdarynyń biri, búginde aýyr naýqasqa ushyraǵan Ǵalymjan Moldabaevqa kórermen atynan aqshalaı máýlit syıy ataldy. Máýlit syıyn naýqasyna baılanysty kele almaǵan ımamnyń ulyna tabystady.
Máýlit merekesiniń joǵary deńgeıde ótýine demeýshilik tanytqan din janashyry, metsenat Baharıddın Ablıazımovke Bas múftı erekshe rızashylyq bildirip, alǵys hat tabystady.
Kórme zalynda qaǵba maketi men qasıetti Quran Kárimniń tupnusqalary, Paıǵambarymyz (oǵan Allanyń salaýaty men sálemi bolsyn) ómirinen syr shertetin sýretter kórermen nazaryna qoıyldy.
Máýlit aıyndaǵy rýhanı sharanyń basty maqsaty – paıǵambarymyzǵa salaýat aıtý, onyń asyl qasıetterin dáripteý, halyq arasynda ımandylyqty nasıhattaı otyryp, turaqtylyq pen tynyshtyqqa úndeý. Salaýat jyrlary men paıǵambarǵa degen ystyq yqylasy saǵynysh sezimine ulasqan kórermen-jamaǵat rızashylyq kóńilmen qımaı qoshtasty.
