BAS MÚFTI MÁJILIS DEPÝTATTARYMEN KEZDESTI (FOTO)

Búgin Astana qalasynda Qazaqstan musylmandary dinı basqarmasynda Bas múftı Naýryzbaı qajy Taǵanuly birqatar Májilis depýtattarymen kezdesti.

Kezdesýge Ermurat Bápı, Qazybek Isa, Samat Musabaev, Amanjol Áltaev, Abzal Quspan, Aıgúl Quspan, Dáýlet Muqaev t.b. depýtattar qatysty. Basqosýda QMDB Tóraǵasy Dinı basqarmanyń ótken jyly atqarǵan aýqymdy is-sharalary týraly aıta kele, el ıgiligi men birligi jolyndaǵy jumys jospary jaıly áńgimelep berdi.    

«Alla qalasa, jýyrda kópten kútken «Islam Entsıklopedııasynyń» birinshi, ekinshi, úshinshi tomy oqyrmanǵa jol tartady. Bul dinı saladaǵy úlken jańalyqtyń, tarıhı oqıǵanyń, irgeli eńbektiń biri bolady. Sonymen qatar «Babalar izimen: Qazaq dalasyndaǵy musylmandyq mektep» kitaby, «Din men dástúr» úshinshi kitaby da jaryq kóredi. Atalǵan eńbekter din men dástúrimizdi dáripteý, musylmandyq mektebimizdi nasıhattaý jolyndaǵy irgeli istiń biri bolmaq. Ózderińiz jaqsy bilesizder, elimiz bıyl Túrki memleketteri uıymyna tóraǵalyq etedi. Qazaqstan musylmandary dinı basqarmasy da ózimiz bastamashyl bolǵan Túrkitildes memleketterdiń múftıler alqasyna tóraǵalyq etedi. Osyǵan oraı elimizde «Qoja Ahmet Iasaýı jáne sopylyq ilimi», «Orta Azııa Fıqh mektebiniń metodologııasy» halyqaralyq konferentsııalar ótkizemiz» dedi Naýryzbaı qajy Taǵanuly.

Basqosýda Bas múftı depýtattardyń saýalyna jaýap berdi. Suhbat barysynda qoǵamǵa qaýip tóndiretin jat dinı aǵymdardyń áreketine tosqaýyl qoıý, din men dástúr sabaqtastyǵyn dáripteý, jas býyn ókilderin teris ıdeologııalardyń zııanynan saqtandyrý máselesi sóz boldy. Kezdesý sońynda taraptar el ıgiligi jolynda birlese qyzmet etýge kelisti.    

​