Bas múftı men vıtse-mınıstr RANT-tyń alqaly jıynyna qatysty (FOTO)

Búgin elordada Qazaqstan musylmandary dinı basqarmasy janyndaǵy Respýblıkalyq aqparattyq nasıhat tobynyń arnaıy alqaly jıyny ótti. Májiliske Bas múftı Naýryzbaı qajy Taǵanuly, QR Aqparat jáne qoǵamdyq damý vıtse-mınıstri Marat Ázilhanov pen RANT músheleri qatysty.

Jıyndy ashqan Bas múftı Naýryzbaı qajy Taǵanuly: «Sizder musylman qaýymyn izgilik pen ıgilikke úndep, elimizdegi dinı aǵartýshylyq salanyń alǵy shebinde júrgen tulǵasyzdar. Alla Taǵala barshamyzǵa halyqty dinge kórkem danalyqpen shaqyrýdy buıyrǵan. Din nasıhaty isinde árqashan yqylas pen yjdahattylyq tanytyp, destrýktıvti aǵym ókilderine túsindirý sharasyn ótkizip, halyqty ımandylyqqa uıyta berýlerińizge tilektespin», – dep atap ótti.

Minberde sóz alǵan vıtse-mınıstr Marat Almasuly destrýktıvti aǵym ókilderine túsindirý sharalaryn belsendi túrde júzege asyryp, nátıjeli jumys kórsetken belgili ǵalymdar, RANT músheleri – Arman Qýanyshbaevqa, Erkebulan Qaraqulovqa, Maqsatbek Qaıyrǵalıevke QR Aqparat jáne qoǵamdyq damý mınıstri Aıda Ǵalymqyzynyń alǵys hatyn tabystady. Sonymen qatar Bas múftı Naýryzbaı qajy Taǵanuly da RANT jumysyna belsene aralasqan ǵalymdardy alǵys hatpen marapattady.

Májilisti júrgizgen QMDB Ýaǵyz-nasıhat bóliminiń meńgerýshisi Batyrjan Mansurov RANT múshesiniń tulǵalyq kelbeti týraly qujatyn tanystyryp, atalǵan qujattyń máni men mańyzyn túsindirip ótti.

Jınalys barysynda ýaǵyz aıtýdyń Etıkasy týraly baıandamalar jasalyp, aqparattyq túsindirý sharalaryn jetildirý joldary talqylandy.