Bas múftı oblys ákimimen óńirdegi dinı ahýaldy talqylady (FOTO)

Bas múftı Naýryzbaı qajy Taǵanuly Batys Qazaqstan oblysynyń ákimi Ǵalı Esqalıevpen kezdesti. Kezdesýde óńirdegi dinı ahýal máselesi sóz bolyp, destrýktıvti dinı aǵymdy aldyn alý, osy baǵytta ońaltý jumystaryna qatysty is-sharalardy birge júzege asyrý, ımamdardyń biliktiligin kóterý máselesi jan-jaqty talqylandy.

Naýryzbaı qajy Taǵanuly ımamdar forýmynda qabyldanǵan «As berý mádenıeti», «Zırat jáne zııarat mádenıeti» qujattarynda kórsetilgen máselelerge nazar aýdardy.

«Biz as berýdiń, zırat kóterýdiń jalpyǵa ortaq mádenıetin qalyptastyrý úshin halyq arasynda nasıhat, túsindirý jumystaryn júrgizip kelemiz. Ózińiz jaqsy bilesiz, as berýde, zırat kóterýde keıbir azamattarymyz astamshylyq jasap, ysyrapqa jol berip jatady. Biz halyqty ysyrap jasamaı, kerisinshe artyq qarajatty qaıyrymdylyqqa, aǵartý salasyna qajetti kitap shyǵarýǵa, muqtaj jandarǵa jumsaýǵa úndep kelemiz. Osy baǵytta jergilikti ákimdikpen birlesken jobalardy júzege asyrýǵa daıynbyz», – dep atap ótti Bas múftı Naýryzbaı qajy Taǵanuly.

Oblys ákimi Ǵalı Nájimedenuly ózekti máseleniń mańyzyna toqtalyp, óz oıymen bólisti.

Kezdesý sońynda taraptar birlese jumys isteýge ýaǵdalasty. Bas múftı oblys basshysyna «Tápsirlerdiń tańdaýlysy» kitabyn syıǵa tartty.

Aıta ketsek, búginde Batys Qazaqstan oblysynda 48 meshit bar. Onda 93 din qyzmetkeri jumys isteıdi.