Bas múftı «Ómirge úmit syıla» aktsııasyna qatysty (FOTO)
Qazaqstan musylmandary dinı basqarmasy «Zeket jáne qaıyrymdylyq» qory bıylǵy qasıetti «Ramazan» aıynyń alǵashqy jumasynda «Ómirge úmit syıla» atty aktsııasyn ótkizdi. Qaıyrymdylyq sharasyna QMDB Tóraǵasy, Bas múftı Naýryzbaı qajy Taǵanuly arnaıy qatysty.
Igi shara barysynda elordadaǵy №1 kópsalaly aýrýhanaǵa 3 dana ottegi kontsentraty, 30 dana pýlsoksımetr, 30 dana tynys alýǵa arnalǵan jabdyq (shlang) tabystaldy. Sondaı-aq, «Berekeli Ramazan syıy» aktsııasymen aýrýhananyń 150 qyzmetkerine azyq-túlik sebetteri taratyldy. Igi shara Ramazan aıy men el táýelsizdiginiń 30 jyldyǵyna oraı uıymdastyrylyp otyr.
«Qazirgi jaǵdaıǵa qaramastan biz qaıyrymdylyq baǵyttaǵy jumystardy toqtatpaımyz. Saqtyq sharalaryn ustana otyryp búgin de osyndaı mańyzdy sharýany qolǵa aldyq. Byltyrdan beri bilesizder aldyńǵy shepte júrip, talaı dertti janǵa qolushyn sozyp kele jatqan dárigerlerimizge biz de rızashylyǵymyzdy bildiremiz. Indetpen kúreste medıtsına mamandarynyń orny bólek. Sondyqtan búgingi qaıyrymdylyqty osy jandarǵa arnap otyrmyz», – dedi Bas múftı.
Aıta ketsek, Dinı basqarmanyń «Zeket» jáne qaıyrymdylyq qory «Ómirge úmit syıla» aktsııasy aıasynda elimizdiń 70-ke jýyq aýrahanasyna 425 mln teńgege qajetti ottegi kontsentraty, IVL, antıseptık, maska, dezınfektsııalyq zattar, qorǵanysh kombınezony syndy kerek-jaraǵyn jetkizgen bolatyn.
Eske sala keteıik búgingi ıgi sharaǵa QMDB Tóraǵasynyń orynbasary, naıb múftı Ershat qajy Aǵybaıuly, Apparat basshysy Ǵylymbek Jádigeruly, «Zeket» jáne qaıyrymdylyq qorynyń dırektory Talǵat Omarov jáne aýrýhana ujymy qatysty.
