Bas múftı on toǵyzynshy qaıyrymdylyq mekemesiniń ashylýyna qatysty (FOTO)

Búgin Batys Qazaqstan oblysyna resmı saparmen barǵan Naýryzbaı qajy Taǵanuly Oral qalasynyń irgesinde salynǵan Qaıyrymdylyq mekemesiniń ashylýyna qatysty.

Saltanatty jıynda Bas múftı: «Búginde Qazaqstan musylmandary dinı basqarmasy jeti baǵyt boıynsha jumystarǵa basymdyq berip keledi. Sonyń biri – qaıyrymdylyq jumys.

Biz qazaq balalaryn oqytyp, olardy otanshyldyq, patrıottyq, ımandylyq baǵytta tárbıeleý máselesine nazar aýdaryp, oblys ortalyqtarynan qaıyrymdylyq mekemelerin ashyp jatyrmyz. Negizgi maqsatymyz – jeke tulǵany ımandylyqqa, adamgershilikke, ulttyq salt-dástúrge saı tárbıeleý, balanyń ǵylymǵa, ónerge, ádebıetke degen qyzyǵýshylyǵyn arttyryp, shyǵarmashylyq qabiletin damytý, olardy patrıotızmge baýlý, tárbıelenýshiniń densaýlyǵyn nyǵaıtyp, salaýatty ómir saltyn qalyptastyrý, olardy zııandy ádetterden saqtaý, turmys jaǵdaıy tómen otbasylarǵa áleýmettik-rýhanı kómek kórsetý, jetim balalardy áleýmettik qoldaý, t.b.

Búgin biz tarıxı sáttiń kýási bolyp otyrmyz. Báıterek aýdanyndaǵy «Asan aýyldyq meshiti» janynan qaıyrymdylyq mekemesin ashyp, el ıgiligine berip otyrmyz. Alla Taǵala osy ǵımarattyń ashylýyna atsalysqan barsha azamattarǵa mol saýaptan jazǵaı! Osy jerden bolashaq ǵalymdar men el ıgiligi úshin qyzmet etetin azamattar shyǵady degen senimdemin» dedi.

Aıta ketsek, eki qabattan turatyn ǵımaratta shákirtter úshin jataqhana, sport zal, dárishana, is-sharalar ótetin arnaıy zal bólmesi bar.

Elimiz boıynsha 19 qaıyrymdylyq mekemesi jumys isteıdi.