Bas múftı Pavlodar oblysy ákimimen kezdesti (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Pavlodar oblysynyń ákimi Ábilqaıyr Baqtybaıulymen kezdesti.

Óńir basshysy Kereký óńirine kelgen Bas múftı bastaǵan delegatsııa jumysyna tabys tiledi.

«Qazir Pavlodar oblysynda 98 meshitimiz ben 8 namazhana bar. Bul óńirde 150 din qyzmetkeri jumys isteıdi. Pavlodar oblysyndaǵy dinı ahýaldy jaqsartý, din qyzmetkerleriniń bilimi men tájirıbesin arttyrý – bizdiń basty nazarymyzda», – dedi Bas múftı.

Kezdesýde QMDB Tóraǵasy men oblys ákimi din qyzmetkerleriniń bilimin arttyrý, jastar arasynda dinı aǵartýshylyq is-sharalardy júrgizý, din men dástúr sabaqtastyǵyn nasıhattaý jumystary boıynsha yntymaqtastyqty arttyrýǵa ýaǵdalasty.

Bas múftı Naýryzbaı qajy Taǵanuly Ábilqaıyr Baqtybaıulyna «Ihsan – rýhanı tárbıe negizi» kitabyn syıǵa tartyp, qoǵamǵa Ihsan ilimin, Isabek ıshannyń, Máshhúr Júsip Kópeıulynyń rýhanı muralaryn nasıhattaýdyń mańyzyn atap ótti.

Basqosý sońynda taraptar táýelsizdigimizdiń 30 jyldyq, Máshhúr Júsip meshitiniń 20 jyldyq mereıtoıy aıasynda birlesken ıgi jobalardy júzege asyrýǵa kelisti.

​