Bas múftı pnevmonııadan qaıtys bolǵan ımamnyń ulyna baspana kiltin tabys etti (FOTO)

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Túrkistan oblysyna jasaǵan arnaıy saparynda Saıram aýdanynyń Arys aýylyndaǵy meshitte ımamdyq qyzmet etken marqum Madıkarım Qurbanbaevtyń balalaryna Múftııat salyp bergen baspananyń kiltin tabys etti.

Igi sharaǵa Qazaqstan halqy Assambleıasy Tóraǵasynyń orynbasary Sherzod Pýlatov, QMDB-nyń Apparat basshysy Ǵylymbek Jádigeruly, Túrkistan oblysynyń bas ımamy Musabek Aqtamberdi aýyl aqsaqaldary men turǵyndary qatysty.

Kóp jyldan beri din jolynda qyzmet etip, asyl dinimizdi nasıhattap, túrli ıgi sharalardyń basy-qasynda júrgen Madıkarım Qurbanbaev álemge dúrbeleń salǵan indettiń saldarynan pnevmonııa keseline shaldyǵyp, jýyrda qaıtys boldy. Artynsha ómirlik jan jary da osy jaman indetten kóz jumǵan bolatyn. Óte qıyn sátte rýhanı hám materıaldyq turǵydan qoldaý maqsatynda Bas múftı Naýryzbaı qajy Taǵanuly «El úlesi – páterge» aktsııasynyń aıasynda asar ádisimen salynǵan 5 bólmeli úıdi marqum M.Qurbanbaevtyń artynda qalǵan uly Abdýlbasıdke tabys etti.

Aıta keteıik, osyndaı qıyn jaǵdaıdy eskerip Túrkistan oblysynyń ımamdary, oblystyq «Zeket» qory ókildigi jáne erikti jamaǵattyń qoldaýymen jańa úı salynyp, paıdalanýǵa berildi.