Bas múftı qaraly úıde marqumdardyń rýhyna Quran baǵyshtady (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly apat bolǵan aımaq – Aqmola oblysy Shortandy aýylyna baryp, qaraly úıde marqumdardyń rýhyna Quran aıatyn baǵyshtap, sabyrǵa shaqyrdy.

«Rasynda, adam balasy jaratylǵan sátten bastap túrli synaqtardy bastan keship keledi. Árıne, halqymyz aıtqandaı, «tas túsken jerine aýyr». Bolǵan iske bolattaı berik bolaıyq. Apat aıtyp kelmeıdi. Ajalǵa amal joq. Qazaqstan musylmandary dinı basqarmasy ujymy qaıǵylaryńyzǵa ortaq. Elimizdegi musylman qaýymy da marqumdarǵa Jaratqannan jarylqaý tileýde. Biz sizderge árqashan kómek berýge daıynbyz. Alla Taǵala bul synaqtyń sońyn jaqsylyqqa almastyrǵaı. Aýrýhanada aýyr hálde jatqan jandardyń dertine Alla shıpa bersin. Ámın!» – dedi Naýryzbaı qajy Taǵanuly.   

Aıta ketsek, jýyrda Aqmola oblysynyń Shortandy kentinde gaz ballony jarylyp, 3 adam kóz jumdy, taǵy on adam aýrýhanaǵa tústi. Oqys oqıǵa 3 páterli turǵyn úıde bolǵan. Gaz ballonynyń jarylýy saldarynan 3 páterli jeke úı órtenip, onyń bir bóligi qulaǵan. Úıindi astynan 3 adamnyń denesi tabyldy. Onyń bireýi kámeletke tolmaǵan bala.

Qazaqstan musylmandary dinı basqarmasy qaıǵyly jaǵdaıǵa baılanysty marqumdardyń otbasyna qarjylaı kómek kórsetti. 

​