Bas múftı Qarttar úıindegi qaıyrymdylyq sharasyna qatysty (FOTO)
Búgin QMDB Tóraǵasy Naýryzbaı qajy Taǵanuly Nur-Sultan qalasyndaǵy «Sharapat» áleýmettik kómek kórsetý ortalyǵynda boldy. Bas múftı «Halal damý» mekemesi uıymdastyrǵan qaıyrymdylyq sharasyna qatysty.
Qarttar úıinde ótken kezdesýde Naýryzbaı qajy Taǵanuly osyndaǵy aýyz bekitken aqsaqaldar men aq jaýlyqty analarǵa Ramazan aıynyń qasıeti men orazanyń paıdasy jaıynda nasıhatyn jetkizdi.
«Alla Taǵala Quran Kárimde: «Ýa, ıman keltirgender! Senderden burynǵy úmmetterge oraza paryz etilgendeı, senderge de paryz etildi. Bálkim saqtanarsyńdar» – degen. Bul aıatta aıtylǵan orazanyń maqsaty – musylmandy tazartyp, taqýalyq dárejege jetkizý. Sondyqtan bul – Alla Taǵalanyń bizderge ámiri, paryzy. Týra jolda, taqýalyqta júrgen jandarǵa Alla Taǵala áke-shesheńdi syıla, olardyń amanatyn orynda, bala-shaǵańa durys tárbıe ber, qorshaǵan ortany syıla deıdi. Osyny oryndaý arqyly adam taqýalyqqa jetedi. Orazadaǵy bizdiń 30 kún ash júrýimiz nápsimizdi tárbıeleıdi. Tamaqtan tyıylǵandaı kúná ataýlydan da saqtanamyz. Mine, orazanyń paıdasy. Sizder de synaqqa moıymaı, Allanyń ámirin oryndap jatyrsyzdar. Nıetterińiz qabyl bolsyn!» – dep duǵa etti Bas múftı.
Munda qarttar men múgedekterge barlyq jaǵdaı jasalǵanymen, óz balalary men týǵan úıiniń jylylyǵy jetpeıdi. Osyny eskergen Bas múftı Ramazan aıynda óz atynan 30 adamǵa aýyzashar qorjynyn taratyp qýanysh syılady. Dinı basqarma tóraǵasynyń kelýin jaqsylyqqa balap, bir serpilip qalǵan qarttar jaǵy da aq batasyn berdi.
Aıta ketsek, búgingi qaıyrymdylyq sharasyna QMDB Apparat basshysy Ǵylymbek Jádigeruly, «Halal damý» mekemesiniń dırektory Aıbek Asqarbekuly, «Sharapat» áleýmettik kómek kórsetý ortalyǵynyń basshysy Yrysty Jaǵyparqyzy qatysty.
