Bas múftı «Qylýet» rýhanı ortalyǵynyń irgetasyn qalady (FOTO)
QMDB Tóraǵasy, Bas múftı Naýryzbaı qajy Taǵanuly Túrkistan qalasyndaǵy «Qylýet» rýhanı ortalyǵynyń irgetasyn qalaý rásimine qatysty. Sondaı-aq is-sharaǵa oblys ákimi Ómirzaq Shókeev, zııaly qaýym jáne din ókilderi, kásipkerler qatysty.
Alǵash bolyp sóz alǵan Bas múftı: «Qazaq poEzııasynyń eren qubylysy Maǵjan Jumabaev «Túrkistan alty alashqa bolǵan Kebe» dep jyrlaǵandaı, kıeli Túrkistan han-sultanǵa turaq boldy, din Islamǵa shyraq boldy. Batyrlardyń qolyndaǵy qalqan boldy, aqyndardyń jyryna arqaý boldy. Muhtar Shahanov aǵamyz «Árqashanda izgilikke buryp eldiń sanasyn, Sen tura ber nurlandyryp qazaqtyń keń dalasyn» dep kıeli shahardy óleńge qosty.
Shynynda, kıeli Túrkistan shahary qazaq dalasyn nurlandyryp, kúnnen kúnge jańa nysandar men eńseli ǵımarattarmen tolyǵyp keledi. Biz turǵan jerde buryn qabyrǵasy sonaý HII ǵasyrda qalanǵan Qoja Ahmet Iasaýı babamyzdyń qylýeti bolǵan edi. Endi mine, Allanyń qalaýymen osy orynda «Qylýet» rýhanı ortalyǵy qaıtadan boı kótergeli tur. Bul ortalyq tarıhı muramyzdy jańǵyrtyp, Túrkistannyń jańa kelbetine kórik qosady degen úmitimiz zor. Alla Taǵala jańa meshitimizdi kıeli Túrkistan shaharynyń rýhanı ordasyna aınaldyrǵaı!» degen Naýryzbaı qajy Taǵanuly ortalyqty salýǵa atsalysyp jatqan barsha kópshilikke alǵysyn bildirdi.
Túrkistan oblysynyń ákimi Ómirzaq Shókeev óz kezeginde ortalyqty jamaǵattyń birigip salyp, úlken saýap alýyna múmkindik berilgenin alǵa tartty.
«Bul ortalyq kásipkerler ǵana emes, jalpy halyqtyń qarjylaı qoldaýymen salynady. Sol úshin arnaıy esepshot jarııalandy. Oǵan kez kelgen adam úles qosa alady. Árıne, ortalyqty bir kásipkerdiń kómegimen de turǵyzýǵa bolar edi. Alaıda jamaǵat bolyp birigip salýdy jón kórdik. Túrkistandaǵy meshitte meniń de kishkentaı úlesim bar degen sezim azamattarǵa jiger beredi. Igi bastamaǵa qoldaý bildirip jatqan azamattarǵa alǵysymyz mol», – dedi oblys ákimi.
Aıta keteıik, rýhanı ortalyqtyń kólemi – 2300 sharshy metr. Jerasty meshitiniń qasynan boı kóteretin medreseniń aýmaǵy – 1282,8 sharshy metr. Ortalyqta medrese, qarılar daıyndaıtyn mekeme, qyzmettik úı bolmaq. Qurylys jumystary bıyl qazan aıynda bastaldy. Alla qalasa, «Qylýet» rýhanı ortalyǵy aldaǵy 2022 jyly tolyqtaı el ıgiligine berilmek.
