BAS MÚFTI SAÝD ARABIIaSY ELShISIMEN KEZDESTI (FOTO)
Elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Saýd Arabııasy Koroldiginiń Qazaqstandaǵy Tótenshe jáne ókiletti elshisi Faısal ben Hanıf ál-Kahtanımen kezdesti.
Kezdesýde eki el arasynda qalyptasqan dostyq, rýhanı baılanystardy damytý, qajylyq pen umra saparyn uıymdastyrý, osy baǵyt boıynsha ortaq jumystardy jańa deńgeıge kóterý máselesi sóz boldy.
«Qazaqstan táýelsizdik alǵannan beri biz Saýd Arabııasymen tyǵyz jan-jaqty qarym-qatynastamyz. Dıplomatııalyq baılanystar aıasynda bizdiń dinı salada da áriptestik ornatqanymyzǵa kóp jyldar ótti. Osy jyldar ishinde bizdiń baılanysymyz nyǵaıa tústi. Qajylyqqa qatysty eki jaqty jumystarymyz jetilip, óz nátıjesin berip keledi. Bıyl elimizden tórt myń adam qajylyǵyn ótep qaıtty. Eki jaqty jobalarymyzǵa qoldaý kórsetip kele jatqan Saýd Arabııa elshiligine alǵys bildiremin. Jaqynda ǵana Mekkede ótken halyqaralyq jıynǵa qatysyp, yntymaqtastyq máselelerin arttyrý boıynsha da birqatar kelissózder jasaldy» dedi Bas múftı.
Elshi óz kezeginde ortaq jobalardy qoldaıtynyn aıta kele Saýd Arabııa Koroldigi atynan Qazaqstanǵa berilgen 50 myń Quran kárimdi Bas múftı Naýryzbaı qajy Taǵanulyna tabystady.
