Bas múftı Stambuldaǵy Hasekı akademııasynda boldy (FOTO)

QMDB Tóraǵasy, Bas múftı Naýryzbaı qajy Taǵanuly Stambuldaǵy saparyn dinı bilim beretin ozyq oqý oryndardyń biri Hasekı akademııasyna arnaıy baryp, ustazdar men shákirtterdiń qazirgi zamanaýı bilim berýdegi ereksheligimen tanysty.

Bilim ordasynyń basshysy Týnjaı Bashogly Bas múftıdi yqylaspen qarsy alyp, Hasekıdegi oqý korpýsyn tanystyrdy. Onyń aıtýynsha, 1975 jyly ashylǵan bilim ordasyn osy kúnge deıin 1300 túlek támamdapty. Sońǵy 10 jylda Qazaqstannan kelip oqyp jatqan stýdentterdiń de sany artqan.

Kezdesý barysynda oqý ordasynyń jetekshisi jýyrda QMDB men Túrkııa Din isteri basqarmasynyń tóraǵalary qabyldaǵan memorandýmǵa saı áriptestik baılanysty jaqsarta beretinin jetkizdi.

Bas múftı Naýryzbaı qajy Taǵanuly: «Dástúrli Islamdy qalyptastyrý jolynda sońǵy 40 jylda eldiń yqylasyna bólengen bilim ordasymen baılanysymyz bekı túspek. Elimizden kelip bilimin jetildirip jatqan shákirtter jańasha baǵytta túrli ádebıetterdi paıdalaný, Quran jattaýdyń metodıkasyn meńgerýge múmkindik aldy», – dep atap ótti.

Sondaı-aq kezdesý barysynda Bas múftı elimizde Islam akademııasy  boı kóteretinin jetkizdi. Hasekı akademııasy basshylyǵy atalǵan oqý ornyna jan-jaqty qoldaý kórsetinin bildirdi.

Naýryzbaı qajy Taǵanuly Túrkııadaǵy aıtýly oqý ordasymen áriptestik baılanys bekip, elimizden keletin shákirtterge qolaıly jaǵdaı jasalatynyn atap ótti.