BAS MÚFTI STÝDENTTER OLIMPIADASYNYŃ JEŃIMPAZDARYN MARAPATTADY (FOTO)
Búgin Qazaqstan musylmandary dinı basqarmasynyń uıymdastyrýymen elimizdegi medrese-kolledj stýdentteri arasynda ótken respýblıkalyq olımpıada qorytyndylandy. Bilim jarysynyń jeńimpazdaryn marapattaý rásimine Bas múftı Naýryzbaı qajy Taǵanuly arnaıy qatysty.
QMDB Tóraǵasy shákirtter men olardyń ustazdaryna, medrese-kolledj ujymdaryna jáne jarystyń ótýine uıytqy bolǵan Dinı bilim jáne kadr daıarlaý bólimine alǵysyn aıtyp, mundaı bilim saıysy bolashaq mamandardyń biliktiligin arttyrýǵa septigin tıgizetinin jetkizdi.
«Sizder Quran úırenip júrgen shákirt qana emes, keleshekte elimizdiń túrli aımaqtarynda asyl dinimizdi nasıhat etetin bolshaq din mamandary, ımam, ustazsyzdar! Qazirgi tańda din qyzmetkerlerine qoıylatyn mindetter ýaqyt pen zaman talabyna sáıkes kúsheıýde. Osyǵan oraı din qyzmetkeriniń kásibı sheberligin damytý, biliktiligin arttyrý basty maqsattyń biri.
QMDB meshitterdi qulshylyq ornymen qatar rýhanı, ımandylyq ortalyqtaryna aınaldyrýdy kózdeıdi. Meshitterde qyzmet jasaıtyn ımamdar men ustazdar dinı bilimdi, bilikti, úlgili, isker, jasampaz, jamaǵatty sońynan ilestire alatyn, sondaı-aq órkenıet kóshine bastaı biletin tolyqqandy maman bolýyn maqsat etedi. Osy baǵytta Múftııat keshendi jumys jasap keledi. Osyǵan deıin «Imamnyń tulǵalyq kelbeti», «QMDB qyzmetkeriniń Etıkasy» atty tálimdik qujattar, «Zııatker ımam» tujyrymdamasy qabyldandy.
Búgingi uıymdastyrylyp otyrǵan bilim olımpıadasynyń da maqsaty – «Zııatker ımam» mártebesine laıyq bolashaq dinı qyzmetkerlerdi tárbıeleý, ıslamtaný salasyndaǵy talantty jastardy anyqtaý, bolashaq ımam-hatıbterdi daıarlaý sapasyn jetildirý, stýdentterdiń tańdaǵan mamandyǵyna qyzyǵýshylyǵyn arttyrý, ıslamtaný pánderin tereń meńgerý, zertteý, dinı salada qyzmet etý úshin áleýetti kadrlardy qalyptastyrý» dedi Bas múftı.
Aıta keteıik, olımpıadaǵa elimizdiń 9 medrese-kolledjinen kelgen 2 jáne 3-kýrs stýdentteri qatysyp, eki kezeńde baq synaǵan bolatyn. Jarys nátıjesi tómendegideı:
2-kýrs stýdentteri arasynda:
1-oryn – Eraly Rınatuly («Astana» medrese-kolledji, 200 000 teńge)
2-oryn – Altynbek Balataýuly («Shymkent» medrese-kolledji, 100 000 teńge)
3-oryn – Aıqyn Aqylbekuly («Úshqońyr» medrese-kolledji, 50 000 teńge)
3-oryn – Arafat Raıymqul («Ábý Hanıfa» medrese-kolledji, 50 000 teńge)
3-kýrs stýdentteri arasynda:
1-oryn – Temirlan Rahmetollauly («Saryaǵash» medreses-kolledji, UMRA qajylyǵyna joldama)
2-oryn – Bekjan Nurlanuly («Ábý Hanıfa» medrese-kolledji, 200 000 teńge)
3-oryn – Eldar Nurlanuly («Oral» medrese-kolledji, 100 000 teńge)
3-oryn – Bekzat Bolatuly («Aqtóbe medrese-kolledji, 100 000 teńge).
