BAS MÚFTI «SÝDYŃ DA SURAÝY BAR» TAQYRYBYNDA ÝAǴYZ AITTY (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordadaǵy «Áziret Sultan» meshitinde «Sýdyń da suraýy bar» taqyrybynda juma ýaǵyzyn aıtty.

Bas múftı sýdyń jer betindegi baǵa jetpes nyǵmet ekenin aıta kele, ony barynsha únemdeý ásirese, musylman qaýymǵa mindet ekenin aıtyp ótti.

«Álemderdiń Rabbysy, Jaratýshymyz Alla Taǵalanyń bizderge bergen nyǵmetteri sheksiz. Osyndaı nyǵmetterdiń biri – sý nyǵmeti. Alla Taǵala qasıetti Qurandaǵy «Ánbııa» súresiniń 30-aıatynda: «Sondaı-aq tirshilik ıeleriniń barlyǵyn sýdan jarattyq», – dep aıtqan. Tápsir ǵalymdary: «Bul aıatta sý jer betindegi barlyq jaratylystyń tirshilik kózi ekeni aıtylýda», – degen. Prezıdentimiz Qasym-Jomart Toqaev óz sózinde: «Sýdy barynsha únemdeýimiz qajet. Halqymyz «Sýdyń da suraýy bar» dep beker aıtpaǵan. Sý degenimiz – únemdep paıdalanbasa, tez taýsylatyn shekteýli resýrs», – dep aıtyp, elimiz úshin sýdyń mańyzy munaı, gaz nemese metaldan kem emestigin atap ótti.

Sý resýrstaryn qorǵaý – tek memlekettiń ǵana isi emes, halyq bolyp atqaratyn jumys. Bizdiń meshitter de sýdy jıi qoldanatyn mekemege jatady. Óıtkeni kúndelikti bes ýaqyt namazdyń aldynda dáret alamyz. Mine, osy kezde sýdy únemdep, shashyp-tókpeı, ysyrap etpeı paıdalanýymyz asa mańyzdy» dedi QMDB Tóraǵasy.

Juma namazynan soń Bas múftı meshit jamaǵatymen birge el amandyǵy men tynyshtyǵy úshin duǵa jasady.

​