BAS MÚFTI TÚRKISTAN OBLYSY IMAMDARYNA NASIHAT AITTY (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Túrkistan oblysyna barǵan saparynda óńir ımamdarymen kezdesip, nasıhat aıtty.
«Imam – izgi qoǵam jarshysy» taqyrybynda ótken kezdesýde Bas múftı Naýryzbaı qajy Taǵanuly: «Ózderińiz jaqsy bilesizder, jýyrda Astana qalasynda uıymdastyrylǵan besinshi ımamdar forýmynda «Imamnyń jamaǵat namazyn ótkizý tártibi», «Qazaqstan musylmandary dinı basqarmasynyń rýhanı (dinı jáne ulttyq) qundylyqtardy nasıhattaýdaǵy róli», «Qajynyń rýhanı kelbeti» tuǵyrnamasy qujattary qabyldandy. Ár ımam ár óńirde rýhanı jetekshi bolǵandyqtan jamaǵat oǵan uıyp, qulshylyq jasaıdy. «Imamnyń jamaǵat namazyn ótkizý tártibi» qujatyn qabyldaýdaǵy maqsat – meshitterde kópshilikpen namaz oqý tártibin birizdilikke túsirý, jamaǵat arasynda túsinispeýshilikterge jol bermeý, sonymen qatar ata-babamyz ustanyp kelgen dástúrli hanafı mázhabyn dáripteý.
Allaǵa shúkir, búginde múftııat qoǵamda ata dinimizdiń asyl qundylyqtaryn dáripteýmen qatar jaqsylyqqa úndeıtin salt-dástúrlerimizdi nasıhattaıtyn rýhanı ordaǵa aınaldy. Biz ulttyq bolmysymyz ben musylmandyq kelbetimizdi saqtap qalý úshin Qazaqstan musylmandary dinı basqarmasynyń rýhanı, ıaǵnı dinı jáne ulttyq qundylyqtardy nasıhattaýdaǵy rólin arttyrýǵa basymdyq berip otyrmyz. Sizderdi ıgi bastamalarymyzǵa úles qosyp, belsendilik tanytýǵa shaqyramyn» dedi.
