Bas múftı Túrkııa delegatsııasyn qabyldady (FOTO)

Elordada QMDB Tóraǵasy, Bas múftı Naýryzbaı qajy Taǵanuly Túrkııanyń «Hasekı» ınstıtýtyna qabyldaý emtıhanynyń komıssııa quramyn qabyldady.

Atap aıtqanda Bas múftı Túrkııa Respýblıkasynyń Din isteri basqarmasynyń shetelderde bilim berý jáne nusqaýlyq ázirleý departamenti basshysy Joshkýn Dýrsýn Alı, Túrkııanyń Aqparattyq damytý departamentiniń basshysy Mahmýt Ózdemır men Oqý-aǵartý jáne baǵdarlama jasaý bóliminiń basshysy Mahmýt Shahın, sondaı-aq Túrkııa Respýblıkasynyń Nur-Sultan qalasyndaǵy elishiliginiń din isteri jónindegi keńesshisi Neshet Bodýrmen júzdesti.

Kezdesýge naıb múftı Ershat Aǵybaıuly, Apparat basshysy Ǵylymbek Jádigeruly men Ýaǵyz-nasıhat bóliminiń meńgerýshisi Batyrjan Berdenuly qatysty.

Aldymen Bas múftı Naýryzbaı qajy Taǵanuly Túrkııadaǵy alapat órt oqıǵasyna baılanysty qonaqtarǵa kóńil bildirip, Jaratqannan jarylqaý men járdem tileıtinin jetkizdi.

«Qazaqstan musylmandary dinı basqarmasy men Túrkııa Pespýblıkasy Din isteri basqarmasy eki memleket arasyndaǵy ortaq tarıhı, mádenı, til jáne dinı, rýhanı baılanystarǵa súıene otyryp, birlese júzege asyryp jatqan dinı qyzmetteri jeterlik. Sonyń biri – osy «Hasekı» ınstıtýtynda bizdiń medrese túlekteriniń bilimin jetildirip, izdenisin kúsheıte túsýge múmkindik alýy. Túrkııa Respýblıkasyndaǵy «Hasekı» ýnıversıtetinde 2013 jyldan beri qazaqstandyq stýdentter bilim alýda. Oqýyn támamdaǵan «Hasekı» túlekteri búginde dinı basqarma qaramaǵynda qyzmet atqarýda», – dedi Bas múftı.

Túrkııa Respýblıkasynyń Din isteri basqarmasynyń shetelderde bilim berý jáne nusqaýlyq ázirleý departamenti basshysy Joshkýn Dýrsýn Alı QMDB Tóraǵasyna Túrkııa múftıi professor Alı Erbashtyń sálemin jetkizip, birlesip júzege asyryp jatqan ıgi isterge sheksiz rızashylyǵyn bildirdi.

Kezdesý sońynda Bas múftı qazaqy qonaqjaı dástúrmen delegatsııa múshelerine qurmet kórsetip, syı jasady.