Bas múftı túrmede dinı alaýyzdyq boıynsha isti bolǵandarmen kezdesti (FOTO)
Búgin QMDB tóraǵasy, Bas múftı Naýryzbaı qajy Taǵanuly Atyraýdaǵy 66-túzetý kolonııasyna bardy. Munda Bas múftı dinı alaýyzdyq týdyrǵan azamattarmen jalpylama kezdesý ótkizdi.
Túzetý mekemesindegi kezdesýge QMDB Apparat basshysy Ǵylymbek Jádigeruly, Sharıǵat jáne pátýa bóliminiń meńgerýshisi Sansyzbaı Shoqanov, Ǵulamalar Keńesiniń múshesi Ersin Ámire men Atyraý oblysynyń bas ımamy Altynbek Utyshanuly, sondaı-aq, Aqparat jáne qoǵammen baılanys bóliminiń meńgerýshisi Marat Bektazınov qatysty.
Eń aldymen sóz alǵan Naýryzbaı qajy Taǵanuly kezinde jaza basyp, qatelikke boı aldyrǵan azamattardy sabyrǵa shaqyryp, eldi, otandy, týysqandy qurmetteýge shaqyrdy. Bizdiń bir ǵana Otanymyz bar. Ol ‒ Qazaqstan. Osy eldiń damýyna úles qosaıyq. Bizdiń týystarymyz, baýyrlarmyz osynda turady. Elge qyzmet ár azamattyń mindeti dedi Bas múftı.
‒ Adam balasynyń kemshiliksiz bolýy múmkin be? «Men eshqashan qatelespeımin» dep oılaıtyn adam ‒ eń úlken qatelesýshi. Óıtkeni, qazaq atamyz baıaǵyda-aq «jańylmaıtyn jaq, súrinbeıtin tuıaq joq» degen. Alla Elshisi (oǵan Allanyń salaýaty men sálemi bolsyn): «Adam balasynyń bári qatelesýshi. Qatelesýshilerdiń eń jaqsysy ‒ táýbege kelgenderi», ‒ degen. Myna dúnıe bizge berilgen bir synaq mekeni. Sál synyp kettik pe, onda osal tusymyz baıqalyp qalady. Osynda ártúrli jaǵdaıda túsken azamattar otyr. Keıde bostandyqtyń qadirin umytyp ketemiz. Degenmen osyndaı synaqqa shydap, sabyrlyq tanytsańyzdar, bul qıyndyqtyqta artta qalar. Endigi qalǵan ǵumyrdy berekeli ótkizýge tyrysý kerek, – dedi Naýryzbaı qajy Taǵanuly kezdesý barysynda.
Sonymen qatar Dinı basqarma tóraǵasy jıyn sońynda Islam jaıynda qazirgi tańdaǵy ashyq ınternet kózderinen aqparatty abaılap paıdalaný qajettigin basa eskertti.
