BAS MÚFTI ULTTYQ ARNAǴA SUHBAT BERDI (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly «Qazaqstan» ulttyq arnasyna orazanyń máni men mańyzy, Ramazan aıynyń qadiri men qasıeti jóninde arnaıy suhbat berdi.
Arna telejúrgizýshisi Sherhan Jambyluly júrgizgen baǵdarlamada Bas múftı: «Izgilerden qalǵan mynadaı sóz bar: «Kemeldikke jetý úshin adam balasyna tórt-aq nárse kerek: az iship-jeý, az uıyqtaý, az sóıleý hám kópshilikten aragidik bólinip, ońashalaný». Pende osy atalǵan tórt qasıetke oraza ustaý arqyly kemeldikke jetedi. Shyn máninde kúni boıy ash qursaq júrgen adam bir aı boıy az tamaq jeýge daǵdylanady. Kúnin orazamen ótkizgen musylman túnin qulshylyqqa arnaıdy. Túngi namazdarǵa kóńil bólip, jamaǵatpen taraýyq namazyna qatysady. Odan bólek tań namazy aldynda túngi táhajýd namazyn óteıdi. Aýzy berik adam artyq sóılep qoıýdan saqtanady, osylaısha az sóıleýge daǵdylanady. Al Ramazan aıynyń sońǵy on kúnin ońasha ótkizýge nıet tanytqan pende ıǵtıkafqa kirip, ózin dúnıe isterinen bosatyp, ýaqyty men kúsh-jigerin qulshylyq jasaýǵa arnaıdy.
Alla Taǵala Ramazan aıyndaǵy orazamyzdy, Qadir túnindegi duǵa-tilekterimizdi qabyl etkeı! Elimiz aman, jurtymyz tynysh bolǵaı! Kelesi Ramazan aıyna aman-esen jetýimizdi Alla násip etsin! Ámın!» dedi.
