BAS MÚFTI ÝNIVERSITET PROFESSORLARYMEN KEZDESTI (FOTO)
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elordadaǵy Sáken Seıfýllın atyndaǵy Qazaq Agrotehnıkalyq zertteý ýnıversıtetine arnaıy baryp, bilim ordasynyń rektory jáne oqytýshy ǵalymdarmen kezdesti.
Aldymen Bas múftıdi arnaıy qarsy alǵan ýnıversıtet basshysy, QR UǴA akademıgi Qanat Tireýov joǵary oqý orny jumysyn tanystyrdy. Sondaı-aq QMDB Tóraǵasy 70 jylǵa jýyq tarıhy bar bilim ordasynyń mýzeıin tamashalap, rektormen suhbattasty. Budan keıin ýnıversıtettiń professor-ǵalymdary, oqytýshy ustazdarymen birge jıynǵa qatysty. Basqosýda Naýryzbaı qajy Taǵanuly baıandama jasap, aýyl sharýashylyǵy salasynyń asyl dinimizdegi mańyzy jóninde maǵlumat berdi.
«Aýyl sharýashylyǵy din tarıhyndaǵy barsha paıǵambarlardyń da adal kásibi boldy. Paıǵambarlar da túrli jumys istep, belgili bir kásip ıgerip, jurtyna jaqsylyǵyn tıgize bildi. Árıne, Islam tarıhynda dúnıesi jetkilikti aýqatty, patsha paıǵambarlar da boldy. Alaıda olar da úmbetine úlgi bolý úshin belgili bir mamandyqqa beıimdeldi. Ardaqty Paıǵambarymyz (oǵan Allanyń salaýaty men sálemi bolsyn): «Eshkim eshqashan óz tabysynan asqan qaıyrly rızyq jegen emes. Allanyń paıǵambary Dáýit te óz qol eńbeginiń jemisin jegen», – degen bolatyn. Mine, osy Dáýit paıǵambar ózi patsha bola tura, qol eńbeginiń jemisin jegen. Dáýit temir ustasy bolsa, Nuh pen Zákarııa paıǵambarlar (olarǵa Allanyń sálemi bolsyn) aǵash ustasy bolǵan.
Sondaı-aq asyl dinimiz ǵylym men bilimge de basa nazar aýdarady. Quran musylmandardy bilimge umtylýǵa, oılanýǵa, zerdeleýge shaqyrdy. Buǵan qasıetti Qurandaǵy: «Shynynda Alladan quldarynyń arasynda ǵulamalar shynaıy kóbirek qorqady» («Fatır» súresi, 28-aıat), - degen. Ardaqty Paıǵambarymyz da (oǵan Allanyń salaýaty men sálemi bolsyn: «Bilimdi talap etý – árbir musylmanǵa paryz» deý arqyly bilim alý árbir musylman áıelge de, erge de saýatty bolyp, bilim úırenýdi úlken mindet ekenin úmbetine ósıet etti. Alash qaıratkeri Mirjaqyp Dýlatuly: «Áýeli úırenetin bir ǵylymyń, ózińniń musylmansha din ǵylymyń», - degen bolatyn. Demek ǵylym úırený – musylmannyń muraty» dedi Bas múftı.
Óz kezeginde bilim oshaǵynyń rektory Qanat Maratuly ýnıversıtet stýdentteriniń bilimimen qatar tárbıesine mán beretinin tilge tıek etip, Qazaqstan musylmandary dinı basqarmasymen birlesip jumys isteýge ázir ekenin jetkizdi. Al Bas múftı Naýryzbaı qajy Taǵanuly joǵary oqý ornyna Dinı basqarmanyń «MUFTIYAT» baspasynan jaryq kórgen dinı, rýhanı-tanymdyq baǵyttaǵy kitaptary syıǵa tartty.
Budan bólek ýnıversıtettiń oqytýshylar quramy Bas múftımen Islam dininiń qazaq dalasyna qanat jaıýy, ulttyq qundylyqtar men salt-dástúr jóninde pikir almasty.
