Bas múftı Jympıtyda jańa meshittiń ashylýyna qatysty (FOTO)

Bas múftı Naýryzbaı qajy Taǵanuly Batys Qazaqstan oblysy Syrym aýdany, Jympıty eldi mekenindegi jańa meshittiń ashylýyna qatysty.

Alla úıiniń ashylýynda Bas múftı Naýryzbaı qajy Taǵanuly: «Ózderińiz jaqsy bilesizder, keńes kezinde qanshama meshitterimizdiń jumysyna tosqaýyl qoıyldy. Allaǵa shúkir, qazir el azamattary yqylaspen meshit, medrese, jol, kópir salyp, halqymyzdyń alǵysyn alýda. Meshitterimizde azan aıtylyp, jurtymyzǵa jaqsylyqty nasıhattaýǵa múmkindik aldyq. Jastarymyz ıman jolyna túsip, jaman ádetten arylýda. Biz osyndaı ıgilikke Allanyń járdemimen birligimiz ben nıetimizdiń arqasynda jettik. Endeshe, osy birligimiz ben berekemizdi odan saıyn arttyrýǵa árbir azamatymyz úles qosýy kerek», – dep atap ótti.

Bas múftı meshitti salǵan jomart jandarǵa alǵys hatyn tabystap, izgi nıetin bildirdi. Igi is-sharada oblys ákiminiń orynbasary Baqytjan Narymbetov, belgili aqyn Muhamedjan Tazabekov quttyqtaý sózin jetkizdi.

Aıta ketsek, jergilikti jomart jandardyń demeýshiligimen salynǵan Syrym aýdandyq ortalyq meshitinde bir mezette 400 adam qulshylyǵyn óteı alady. Alla úıinde dárishana, ustazdar, ımamdar bólmesi, áıelder zaly bar.

​