Bas múftı zırat basyndaǵy izgi is-sharaǵa qatysty (FOTO)
Búgin QMDB «Qamqor-Sharapat» salttyq qyzmet kórsetý ortalyǵynyń uıymdastyrýymen elimizdiń barlyq óńirinde zırat mańyna tazalyq jumystary júrgizildi. Oǵan QMDB-ǵa qarasty 19 ókildiktiń din qyzmetkerleri jáne meshitterdiń erikti jamaǵaty bir mezette atsalysyp, saýapty iske jumyla kiristi.
Al Nur-Sultan qalasy ókildiginiń uıytqy bolýymen elorda mańynda ornalasqan qorym basynda ótken ıgi is-sharaǵa QMDB Tóraǵasy, Bas múftı Naýryzbaı qajy Taǵanuly arnaıy qatysty. Aldymen respýblıkalyq «Áziret Sultan» meshitiniń ustazy, qarı Murtaza Balahmet qasıetti Quran aıattaryn oqyp, Bas múftı arnaıy duǵa jasady.
Budan keıin Naýryzbaı qajy Taǵanuly elorda ımamdary, din qyzmetkerleri men erikti jamaǵatqa zırat jáne zııarat ádebine qatysty nasıhatyn jetkizdi.
«Adam ómirge kelgen kezde qalaı qýanyp, mápelep úıimizge ákelgenimiz sekildi, qaıtqan kezde de ony arýlap jerleımiz, qabirge qoıamyz. Allanyń quzyrynda tiri adam qandaı qadirli bolsa, qaıtys bolǵan adam da sondaı qadirli. Onyń tóbeshik bolyp tursa da, qabirin aıaqasty etýge, mańaıyn qoqysqa toltyryp, lastaýǵa eshkimniń aqysy joq. Qaıta mańaıyn qorshap, tazalyq jasap turý – tirilerge mindet.
Asylynda zırat – barsha adamzattyń Jaratýshy aldynda teń ekenin, ımandylyq, taqýalyq sekildi izgi qasıettermen ǵana bıik turatynyn kórsetetin ǵıbrat mekeni. Adam balasynyń Alla quzyrynda teń ekeni qasıetti Quran aıattary men ardaqty Paıǵambarymyz Muhammedtiń (oǵan Allanyń salaýaty men sálemi bolsyn) hadısterinde ashyq aıtylǵan. Zırattarǵa qulpytas qoıý kezinde teńdik ustanymyn saqtaýymyz kerek.
Osy aıtqanymyzdy, ıaǵnı, zırat jáne zııarat mádenıetin ımamdarymyz kópshilik jerde aıtyp, nasıhattaýǵa tıis. Alla Taǵala saýapty iske atsalysqan barshańyzǵa razy bolsyn!» dedi Bas múftı.
Aıta keteıik, jyl basynda Bas múftı bastamasymen marqumdardyń basyna belgi qoıyp, mazar salýdy birizidilikke túsirý maqsatynda «Qamqor-Sharapat» salttyq qyzmet kórsetý ortalyǵy qurylyp, Imamdardyń IV respýblıkalyq onlaın forýmynda «Zırat jáne zııarat mádenıeti» qujaty qabyldanǵan bolatyn. Búginde el meshitteriniń ımamdary atalmysh qujatty jurtshylyqqa nasıhattap, ysyrapshyldyqtan aýlaq bolýǵa úndep júr.
«Qamqor-Sharapat» salttyq qyzmet kórsetý ortalyǵynyń dırektory Kamaljan Turdybaevtyń aıtýynsha, Dinı basqarma usynǵan qulpytastaǵy marqumnyń sýretiniń ornyna QR-kod qosyldy. Iaǵnı kez kelgen smartfon qoldanýshy atalmysh QR-kod arqyly ortalyq saıtyna ótip, marqumnyń ómirderegi jóninde bile alady.
