BAS MÚFTIGE QAJYLYQ-2022 MAÝSYMYNDA ATQARYLǴAN IS-ShARALARDYŃ ESEBI BAIaNDALDY (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen Qajylyq-2022 maýsymynda atqarylǵan is-sharalardyń esebin qorytyndylaý jıyny ótti.
Qajylyq maýsymyn qorytyndylaýǵa arnalǵan májiliske Dinı basqarma ujymy men bıylǵy Qazaqstan qajylyq mıssııasynyń quramy qatysty.
QMDB Tóraǵasy eń aldymen Qurban aıtpen qatar keletin bes paryzdyń biri qajylyq maýsymynyń abyroıly ótkenin aıtyp, elimizden barǵan 4 000 adamnyń aman-esen qulshylyǵyn ótep kelýine barynsha atsalysqan mıssııa jumysyna, Elshilik pen Saýd Arabııa tarapynyń qoldaýyna toqtalyp ótti.
«Qajylyq maýsymyn uıymdastyrý Dinı basqarma jumysynyń bir salasy. Osyǵan erekshe mán berilip, pandemııadan keıin qysqa merzimde úlken jumystar atqaryldy. Árbir otandasymyzdyń qulshylyǵyn erkin óteýine jaǵdaı jasaýǵa tıispiz. Sondyqtan osy kezeńde júk bizge de artylady. Mıssııa quramy osy mindetti abyroımen atqardy. Bul isti barynsha jetildire túsýge tıispiz» dedi Bas múftı.
Jıyn barysynda sóz alǵan bıylǵy mıssııa tóraǵasy, naıb múftı Ershat Aǵybaıuly qajylyqty uıymdastyrýda bes baǵytqa bólgenin jetkizdi. Atap aıtsaq, uıymdastyrýshylyq, ekinshi ýaǵyz-nasıhat, aqparat, alǵashqy dárigerlik kómek jáne dinı suraq-jaýap.
«Uıymdastyrý jumystary elimizden bastaldy. Ár qajynyń ushaq bortyna otyrýynan bastap, qasıetti mekenge aman jetýine deıingi baǵyty qadaǵalandy. Qajylardyń rýhanı demalysyn sátti paıdalanyp, ár kompanııaǵa Dinı basqarma tarapynan ýaǵyzshy ımamdar bekitildi. Sondaı-aq otandastarymyz toqtaǵan qonaq úılerdiń sapasy, ashana, ornalasqan orny tekserildi.
Ekinshi baǵyt – ýaǵyz-nasıhat. 4 000 qazaqstandyq qajyǵa 399 taqyrypta ýaǵyz aıtyldy. Al úshinshi baǵytymyz aqparatqa keler bolsaq, muftyat.kz saıtyna 14 maqala, 4 suhbat jáne 47 aqparat berildi. Munara telearnasyna qajylyqqa qatysty 12 beınematerıal shyǵyp, tilshimiz 3 ret Mekke qalasynan tikeleı Efırde tildesti. Qazaqstan qajylyq mıssııasy janyndaǵy Sall center Mekke men Mádına qalalaryndaǵy qazaqstandyq qajylardyń 739 suraǵyna jaýap berdi. 1 155 adamǵa alǵashqy dárigerlik kómek kórsetildi» dedi naıb múftı óz esebinde.
Al Bas múftı Naýryzbaı qajy Taǵanuly jańa qajylyq maýsymyn uıymdastyrý sharalaryn qyrkúıek-qazan aıynan bastaýdy tapsyryp, qasıetti sapardy uıymdastyrý jumysyn jetildirý jaǵyn basa aıtty.
Jıyn sońynda mıssııa músheleri qajylyqtaǵy mańyzdy jaıttarǵa toqtalyp, naqty usynystaryn jetkizdi.
